საქართველოს მოქალაქეების ნაწილი საპარლამენტო არჩევნების შედეგებს თბილისში, პარლამენტის შენობის მიმდებარე ტერიტორიაზე აპროტესტებს. დღევანდელ აქციას სხვადასხვა რეგიონიდან, მათ შორის ზუგდიდიდან უერთდებიან. რადიო "ათინათთან" პროტესტის მონაწილეები ამბობენ, რომ დღეს მნიშვნელოვანია საკანონმდებლო ორგანოსთან მოქალაქეების დიდი რაოდენობის მობილიზაცია, რადგან მე-11 მოწვევის პარლამენტის პირველი სხდომა და პარლამენტის წევრების უფლებამოსილების ცნობა არალეგიტიმურია.

"პარლამენტის დღევანდელი სხდომა არალეგიტიმურია. მისი შემადგენლობა არ ასახავს იმ არჩევანს, რაც ქართველმა ხალხმა გააკეთა. არჩევნები ტოტალურად გაყალბდა და დღევანდელი აქციაც იმ საერთო, დიდ მიზანს ემსახურება, რომ უნდა დაინიშნოს ხელახალი არჩევნები. პარლამენტის შემადგენლობა უნდა ასახავდეს მოქალაქეთა მიერ გაკეთებულ რეალურ არჩევანს. "ქართულ ოცნებას" ეს არჩევნები არ მოუგია და ამ გზით მოვიდნენ ისინი ე.წ უმრავლესობაში. ის ვითარება, რაც ჩვენს ქვეყანაშია გვაკარგვინებს დასავლურ მომავალს. ჩვენმა ქვეყანამ არ უნდა დაკარგოს ევროპული მომავალი", - ამბობს "საერთაშორისო გამჭვირვალობა - საქართველოს" რეგიონული ოფისის ხელმძღვანელი არჩილ თოდუა.

აქციაზე იმყოფება ზუგდიდის შოთა მესხიას უნივერსიტეტის სტუდენტების ნაწილიც. მათი თქმით, ისინი აგრძელებენ არჩევნების შედეგების გაპროტესტებას ახლა უკვე თბილისში, რადგან, როგორც ამბობენ, რუსულ რეჟიმთან ბრძოლის მთავარი ლოკაცია არის დედაქალაქი, პარლამენტის შენობის წინ.

"ვაგრძელებთ ბრძოლას რუსული რეჟიმის წინააღმდეგ. ვუერთდებით, თბილისში მიმდინარე აქციას, რადგან ვთვლით, რომ მთავარი ბრძოლის ველი ახლა არის პარლამენტთან, სადაც მთავრობა დღეს ცდილობს თვითლეგიტიმაციას. თითქმის ყველა სტუდენტი, რომელიც აქციაში იყო ჩართული, ნაწილი უკვე წასულია, ნაწილი კი ამ საღამოდან შევუერთდებით მათ. სტუდენტების პროტესტი გაგრძელდება, თუ რა ფორმით იქნება ეს, ამაზე განცხადებას გავავრცელებთ", - თქვა ზუგდიდის უნივერსიტეტის სტუდენტმა, ანა ჭანიამ.

ცნობისთვის, დილიდან პარლამენტის მიმდებარე ტერიტორიაზე აქციის მონაწილეები იკრიბებიან, რომლებიც საპარლამენტო არჩევნების შედეგებს კვლავ აპროტესტებენ. ადგილზე მობილიზებულია საპატრულო პოლიციისა და კრიმინალური პოლიციის თანამშრომლები. პარლამენტის შესასვლელთან რკინის ღობე და ჯებირია აღმართული.

მე-11 მოწვევის პარლამენტმა, რომელსაც მხოლოდ პარტია "ქართული ოცნება" ესწრება, პარლამენტის 150-ვე წევრის უფლებამოსილება ცნო. საარჩევნო ბარიერგადალახული ოპოზიციური პარტიები საკანონმდებლო ორგანოში არ იმყოფებიან. ისინი არჩევნების შედეგების ლეგიტიმაციას არ ცნობენ.