ზუგდიდში საპროტესტო აქციის მონაწილეები მსვლელობით გაემართნენ აღმაშენებლის ქუჩაზე, ქალაქის შემოსასვლელისკენ, ისინი სხვა მოქალაქეებს მოუწოდებდნენ შეუერთდნენ პროტესტს.


„დღეს ბიძინა ივანიშვილმა საბოლოოდ გვითხრა, რომ საქართველო არის რუსეთის უკანა ეზო. ჩვენ ქართველი ხალხი არაფრით დავთმობთ ჩვენს ისტორიულ მონაპოვარს, დღეები დარჩა ბიძინა ივანიშვილს და ირაკლი კობახიძეს, როგორც ლუკაშენკომ გააკეთა თავის დროზე, გამოვიდა უკრაინელი ხალხი და ლუკაშენკო გაუშვა მოუსავლეთში, რუსეთში ესევე მოუწევს კობახიძეებს, მდინარაძეებს და პირველ რიგში, ბიძინა ივანიშვილს, წასვლა. ვაპროტესტებთ საქართველოს რუსეთიზაციას, არავითარ შემთხვევაში, საქართველო ვერ გახდება რუსეთის უკანა ეზო“, - განაცხადა მაია კალანდიამ, პარტია "ახალის" წევრმა და საკრებულოს დეპუტატმა.

აქციის კიდევ ერთმა მონაწილემ, ,,სამართლიანი არჩევნების” ზუგდიდის ოფისის ხელმძღვანელმა, დავით ლოგუამ განცხადა, რომ „ქართული ოცნების“ გადაწყვეტილება“ არის პირდაპირი განაცხადი, რომ საქართველო დაუბრუნდეს რუსულ ორბიტას“

„სწორედ ამას ვაპროტესტებთ, ჩვენ აქ გამოსული ადამიანები. ჩვენ გვაქს ბრაზი, იმასთან დაკავშირებით, რომ რუსეთმა, ტყვიის გასროლის გარეშე მიიტაცა საქართველო“, - აღნიშნა მან.

ევროპული მომავალი, ქვეყნის ისტორიული არჩევანი და მოცემულობაა და ეს ადგილიც სიმბოლურად შეირჩა შეკრებისთვის:

„ევროპული მომავალი ქვეყნის ისტორიული არჩევანი და მოცემულობაა, ჩვენ აფხაზეთის და ოსეთის დაბრუნება გვსურს, ამ წუთას ჩვენ ვდგავართ გზაჯვარედინზე, რომელიც ზუგდიდის შემოსასვლელში აქედან 50 მეტრში 1924 წლის აჯანყების დროს იყო ერთ - ერთი ყველაზე მნიშვნელოვანი შეტაკება აჯანყებულებსა და რუსულ რეჟიმს შორის, სიმბოლურია რომ ჩვენ ამ ადგილას ვაპროტესტებთ ამ ყველაფერს , იმიტომ, რომ 1924 წლის აჯანყების მონაწილეთა სულების წინაშე უნდა ვიყოთ მართლები, იმ ადამიანთა წინაშე ვინც საუკუნეების მანძილზე იბრძოდა ამ ქვეყნის თავისუფლებისთვის, მაშინ ჩვენ რუსეთმა დაგვიპყრო იარაღით, დღეს გვიპყრობს იარაღის გარეშე, ბნელი ძალებით, მაგრამ ამ ყველაფერს ჩვენ აუცილებლად გავუწევთ წინააღმდეგობას და გავიმარჯვებთ“, - განაცხადა "საერთაშორისო გამჭვირვალობა - საქართველოს" რეგიონული ოფისის ხელმძღვანელმა არჩილ თოდუამ.

პროტესტის მონაწილეები ზუგდიდის შესასვლელთან გაჩერდნენ და დროებით, გზა გადაკეტეს. ადგილზე მობილიზებულები არიან სამართალდამცავები.

მანამდე, ზუგდიდის მცხოვრებლების ნაწილი, სამოქალაქო საზოგადოების და ოპოზიციური პარტიების წარმომადგენლები, სამხარეო ადმინისტრაციის შენობის წინ შეიკრიბნენ, მას შემდეგ, რაც „ქართულმა ოცნებამ“ განაცხადა, რომ წყვეტს ევროკავშირთან მოლაპარაკებებს 2028 წლამდე.