ზუგდიდელი მასწავლებლები ეხმიანებიან ევროკავშირთან მოლაპარაკებების პროცესის 2028 წლამდე შეჩერების შესახებ "ქართული ოცნების" გადაწყვეტილებას და გაფიცვას იწყებენ.

მათი თქმით, დღეს, ქვეყნის ევროატლანტიკური მომავალი საფრთხეშია და საქართველოს ყველა მოქალაქე ვალდებულია დაიცვას კანონმდებლობა, კონსტიტუციის 78-ე მუხლი, რომელიც ევროინტეგრაციის საკითხებს განსაზღვრავს.

"მასწავლებლების გაფიცვა აქამდე არავის უნახავს, არათუ გაფიცვა არამედ ქუჩაში გასაპროტესტებლად გამოსული მასწავლებელიც არავის უნახავს. თუმცა, ყველაფერს აქვს საზღვარი და ყველა წითელი ხაზი არის უკვე გადალახული. ამიტომ, მიმდინარე პროცესებმა მასწავლებლებში პროტესტი გამოიწვია. ჩვენ ვიცით, რომ, კანონმდებლობით, პარლამენტს არ აქვს უფლება პრეზიდენტის მოწვევის გარეშე შეიკრიბოს. მიუხედავად ამისა, მათ ჩაატარეს პირველი სხდომა. ყაველაშვილი, რომელსაც დიპლომიც კი არ აქვს, წარმოგვიდგინეს პრეზიდენტობის კანდიდატად. ამით, მთლიანად საგანმანათლებლო სივრცეს დასცინეს და გარდა ამისა, ჩვენ კონსტიტუციით გვაქვს განსაზღვრული ევროინტეგრაციის საკითხი. კობახიძემ კი თავისი ხელით ჩაწერა ეს კონსტიტუციაში. ჩატარებული რეფერენდუმის შედეგად, მოსახლეობის 70%-მა დაუჭირა მხარი ევროინტეგრაციას. ისინი წყვეტენ ევროპასთან კავშირს და მიგვაქანებენ რუსეთში. ჩვენ არ დავუთმობთ ქვეყანას რუსეთს. ჩვენ არალეგიტიმურ მთავრობას არ დავემორჩილებით. სანამ არ გვეყოლება ლეგიტიმური მთავრობა, არ ვარ ვალდებული გამოვცხადდე სკოლაში", - უთხრა რადიო "ათინათს" მიკო მიქავამ, ზუგდიდის სოფელ ონარიის საჯარო სკოლის მასწავლებელმა.

ქვეყანაში მიმდინარე პროცესებთან დაკავშირებით, კიდევ ერთი მასწავლებელი, მაია წურწუმია სოციალურ ქსელში წერს, რომ დღეს, მომავალი თაობების ბედი წყდება ქუჩაში და აღნიშნავს, რომ სახლში გაჩერების დრო არ არის.

"საგაკვეთილო პროცეს ვწყეტ 14 :00 საათიდან! გუბერნიასთან იქ სადაც ჩემი შვილების, მოსწავლეების ბედი წყდება! მხოლოდ 14 საათამდე ჩატარდება გაკვეთილები! არაა დრო იმის ვიჯდე ოთახში და ან რა მიზეზი მქონდე ვასწავლო უცხო ენა? სო მეურქუ? ევრობაშა", - წერს ფეისბუქ გვერდზე მაია წურწუმია.

შეგახსენებთ, მოქალაქეების ნაწილის პროტესტი უკავშირდება პრემიერ-მინისტრის ირაკლი კობახიძის განცხადებას, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს. 28 ნოემბერს, საღამოს, კობახიძის ბრიფინგის შემდეგ, საქართველოს სხვადასხვა ქალაქში, მათ შორის ზუგდიდში მოქალაქეები ქუჩაში გამოვიდნენ და ქვეყნის დასავლური კურსიდან გადახვევას აპროტესტებდნენ. თბილისში, შინაგან საქმეთა სამინისტროს დანაყოფებმა რუსთაველის გამზირზე მიმდინარე აქცია ძალის გამოყენებით დაშალეს. პროფესიული მოვალეობის შესრულებისას, პოლიციამ ფიზიკურად იძალადა ჟურნალისტებზე და ოპერატორებზე. დაშავებულებს შორის არიან სამოქალაქო აქტივისტები, მოქალაქეები და პოლიტიკოსები. საქართველოს პრეზიდენტი სალომე ზურაბიშვილი თბილისში, პარლამენტის შენობის წინ შეკრებილ დემონსტრანტებთან მივიდა. აქციის მონაწილეებთან შეხვედრის შემდეგ კი გაემართა თავისუფლების მოედნისკენ და იქ განლაგებულ სპეცდანიშნულების რაზმს უთხრა, რომ მათი მოვალეობა ქვეყნის სახელმწიფოებრიობისა და მოქალაქეების დაცვაა.

მასალა განახლდება