ამ წუთებში, ზუგდიდში, სახელმწიფო რწმუნებულის ადმინისტრაციის შენობის წინ, აქცია მიმდინარეობს.
შეკრებილებს ხელში უჭირავთ საქართველოს და ევროკავშირის დროშები. აქციის სლოგანია „სოლიდარობა რეჟიმის პატიმრებს“.

როგორც ორგანიზატორები აცხადებენ, დღევანდელი შეკრება, ოდნავ განსხვავებული ფორმატით ჩატარდება, ელექტრონული მუსიკის შემსრულებლები შეუერთდებიან საერთო - სახალხო პროტესტს.

ზუგდიდში, მოქალაქეები, მათ შორის, სამოქალაქო აქტივისტები, სტუდენტები, აბიტურიენტები და ოპოზიციური პარტიების წარმომადგენლები, უკვე მე - 10 დღეა აპროტესტებენ „ქართული ოცნების“ გადაწყვეტილებას 2028 წლამდე ევროკავშირთან მოლაპარაკებების შეჩერების შესახებ.


მათი მონაწილეების განცხადებით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.

შინაგან საქმეთა სამინისტროს ინფორმაციით, 6 - 7 დეკემბრის ღამეს, რუსთაველის გამზირზე მიმდინარე პროევროპულ აქციაზე 48 ადამიანი, ხოლო სულ, 9 დღის თავზე, „პოლიციის კანონიერი მოთხოვნის დაუმორჩილებლობისა და წვრილმანი ხულიგნობის“ მუხლებით 386 პირია დაკავებული.