აქცია იმართება ამ წუთებში ზუგდიდში, სახელმწიფო რწმუნებულის ადმინისტრაციის შენობის წინ. ეს არის მოქალაქეების პროტესტის მე - 13 დღე.

ისინი ისევ შეიკრიბნენ ქალაქის ცენტრში, რათა გააპროტესტონ „ქართული ოცნების“ გადაწყვეტილება, ევროკავშირთან მოლაპარაკებების გახსნის 2028 წლამდე შეჩერების შესახებ.

გამომოსვლელები შეკრებილებს მიმართავენ. დემოკრატიული ჩართულობის ცენტრის ზუგდიდის ოფისის ხეელმძღვანელი ეკა მინჯორაია ამბობს, რომ ის შეშფოთებულია, ისევე, როგორც საქართველოს სხვა მოქალაქეები, რომელთაც ართმევენ თვისუფალ საქართველოს და ევროპული გავითარების გზას.

ჩვენ ყოველ დღე ვხედავთ ახალგაზრდების დაკავების, ცემის, ჩხრეკის კადრებს, ვხედავთ ამ დღეებში როგორ ძალადობენ ახალგაზრდებზე, ჟურნალისტებზე. სცემენ დაკავების დროს, გაზის კაფსულებს უგდებენ. მოვისმინეთ ექიმებისგან, რას უტოლდება ეს ქმედება... მე წარმოვადგენ სამოქალაქო სექტორს, მეამაყება ის საქმიანობა, რომელსაც მე ამ ქალაქში ვახორციელებ, სხვა ორგანიზაციებთან ერთად, მე ვაძლიერებ ახალგაზრდებს, ქალებს, დემოკრატიულ მმართველობას, ვაძლიერებ სამოქალაქო ჩართულობას“, - თქვა მან.

მინჯორაიამ აღნიშნა, რომ 2012 და 2020 წლებში ის იყო „ქართული ოცნების“ ამომრჩეველი, თუმცა, მისი თქმით, დღეს „ქართული ოცნება“, რომელმაც „ამოგვიტრიალა კონსტიტუცია“, ქვეყანას მიაქანებს, დიქტატურისკენ, რუსეთისკენ“.

მან მოქალაქეებს ერთობისკენ მოუწოდა, რათა ისინი დასავლელი პარტნიორების დახმარებით, დაუბრუნდნენ თავისუფლებას და ევროპული განვითარების გზას.

აქციის დასრულების შემდეგ, შეკრებილები, მსვლელობით გაემართებიან ზუგდიდის ქუჩებში, მათ გაშალეს საქართველოს დიდი დროშა, რომ თანაქალაქელებს მოუწოდონ, შეუერთდნენ პროტესტს.

28 ნოემბრიდან, საპროტესტო დემონსტრაციები, საქართველოს მასშტაბით იმართება.

ამავე თემაზე: 

ყოველდღე ქვეყნის სამსახურში - ზუგდიდში აქცია მიმდინარეობს (ფოტო)

ზუგდიდში ჟურნალისტების სოლიდარობის აქცია გაიმართა (ფოტო)

„გაიფიცე“, - ახალგაზრდების აქცია ზუგდიდის მერიასთან

სამეგრელო რუსული რეჟიმის წინააღმდეგ - ზუგდიდში საპროტესტო აქცია გაიმართა (ფოტო)

ზუგდიდში ბულვარში, ხელახალი არჩევნების ჩატარების მოთხოვნით, აქცია იმართება (ფოტო)