სოხუმიდან „დონბასსა და რუსეთის ახალ რეგიონებში“ ჰუმანიტარული ტვირთით დატვირთული კოლონა გაემართა. ინფორმაციას აფხაზეთის დე ფაქტო რესპუბლიკის საგანგებო სიტუაციების სამინისტრო ავრცელებს.
მათივე ცნობით, ტვირთი მიეწოდება დონეცკის და ლუგანსკის ე.წ. რესპუბლიკების, ზაპოროჟიეს, ხერსონის, კურსკის ოლქების მცხოვრებლებს, ასევე რუსეთის მხარეს მებრძოლ აფხაზ მოხალისეებს, რომლებიც „პიატნაშკას“ ბატალიონში.

აქვე აღნიშნულია, რომ ტვირთში, რომელიც იწონის 110 ტონას, ციტრუსები და ბოთლირებული წყალი შედის. ის „აფხაზეთის სომხური თემის, კულტურული და საქველმოქმედო ფონდი „ამშენის“ და აფხაზური ციტრუსის კომპანიის“ მხარდაჭერით შეგროვდა.

ოკუპირებული აფხაზეთის ე.წ. პრეზიდენტის მოვალეობის შემსრულებელმა, ბადრა გუნბამ განაცხადა, რომ დე ფაქტო რესპუბლიკა მომავალშიც გაუწევს დახმარებას „დონბასს და რუსეთის ახალ რეგიონებს“.

ინფორმაციისთვის, აფხაზი ლიდერის ასლან ბჟანია გადადგომის და ე.წ. პარლამენტის მიერ საინვესტიციო ხელშეკრულების ჩაგდების შემდეგ, მოსკოვმა სრულად შეუჩერა სოხუმს დაფინანსება.

ოკუპირებულ აფხაზეთში ე.წ. საპრეზიდენტო არჩევნები 2025 წლის 15 თებერვალს გაიმართება.