დღეს, 25 დეკემბერს, ზუგდიდში ქალთა მარში გაიმართა. სხვადასხვა თაობისა და პროფესიის ქალები ცენტრალური ბულვარის ტერიტორიაზე, რაფიელ ერისთავის ბიუსტის მიმდებარედ 17:00 საათზე შეიკრიბნენ და სხვადასხვა საპროტესტო შეძახილებით ქალაქის ცენტრალური ქუჩებისკენ გაემართნენ.

პროტესტის მონაწილე ქალებს ხელში ბანერები ეწერათ წარწერებით: "მთლიანი ევროპის შემორიგება უფრო მარტივია, ვიდრე გაბრაზებული მეგრელი ქალის", "გავიმარჯვებთ სახელოვნად", "ქართლის დედა არასდროს გახდება მატუშკა", "თავისუფლება რეჟიმის პატიმრებს", "ქალები ბოდიშს არ იხდიან".

მათი თქმით, პროტესტის მთავარი მოთხოვნები რჩება უცვლელი, რაც ხელახალი არჩევნების ჩატარებასა და თბილისში, აქციების დროს დაპატიმრებული მოქალაქეების გათავისუფლებას გულისხმობს.

"უწყვეტი პროტესტის 28-ე დღეა და საქართველოს ყველა დიდ ქალაქში, თბილისში, ქუთაისში, ბათუმში, ზუგდიდში მიმდინარეობს ქალების მარში და ჩვენი მოთხოვნა ისეთივეა, როგორც ეს 28 დღეს იყო. ეს არის გათავისუფლდნენ რეჟიმის პატიმრები და დაინიშნოს ხელახალი არჩევნები იმისთვის, რომ საქართველო დაბრუნდეს თავის ისტორიულ სახლში, შინ ევროპაში", - ამბობს რადიო "ათინათთან" მეწარმე ციცინო შენგელია.

სამოქალაქო აქტივისტი კერენ ესებუა აღნიშნავს, რომ აუცილებელია პოლიციური სისტემის ჩამოშლა, რაც მისი თქმით, ჯანსაღი სახელმწიფოს მშენებლობის წინაპირობა გახდება.

"ჩემი სათქმელი არის ის, რომ ეს რეპრესიული, წმინდად პოლიციური, სრულიად დიქტატორული რეჟიმი არის მოსასპობი, დასანგრევი და თუ კი რამეს ვიტყვი, როგორც ქალი, ქალები აუცილებლად მოვუღებთ ამ რეჟიმს ბოლოს. ყველაფერი გადაიტანა ამ ქვეყანამ და ქალებს არაერთხელ გამოუყვანიათ ეს ქვეყანა და ისევ დაუყენებიათ სწორ გზაზე. ჩვენ შეგვწევს ძალა, ეს სისტემა ისევ ჩამოვშალოთ და დავიწყოთ ამ ქვეყნის მშენებლობა, რომელიც ბევრად უფრო ჯანსაღი იქნება, რაშიც იგულისხმება, რომ გვექნება კარგი განათლების სისტემა, ხელმისაწვდომი ჯანდაცვა და აღარ იქნება პოლიციური რეჟიმი და არცერთმა პოლიტიკურმა კლასმა აღარ უნდა იფიქროს, რომ ხალხს მოექცევა ისე, როგორც ახლა "ქართული ოცნება" ექცევა და ტერორში ამყოფებს", - განმარტავს ესებუა.

აქტივისტი ივდო ოტობარი ამბობს, რომ საქართველოს ისტორიაში ქალების ხმა მუდმივად ისმოდა, ევროკავშირში გაწევრიანება კი ხელს შეუწყობს მათი ფუნდამენტური უფლებების უფრო მეტად დაცვას.

"ჩვენ შევიკრიბეთ, რადგანაც ქალების ხმა ისმოდეს, განსაკუთრებით კი რეგიონებში, სადაც უფრო ნაკლებად ხდება ხოლმე ეს. აქ არ არის მხოლოდ ხელისუფლებისა და რეჟიმის პრობლემა. ჩვენ ქალები არაფერ ახალს არ ვაკეთებთ იმიტომ, რომ წლებია ყოველდღიურად საკუთარი უფლებებისთვის ვიბრძვით. იმ ქალების ნაცვლადაც ვდგავართ აქ, ვინც რეჟიმმა გააჩუმა ან ფემიციდის მსხვერპლი გახდნენ. ჩვენ გვჭირდება ევროპა, რადგან ჩვენი ყოველდღიური უფლებები იყოს დაცული და არ გვეშინოდეს ღამით ქუჩაში გამოსვლისა და ძალადობის. აუცილებელია, პროტესტი გაგრძელდეს და ზოგადად მინდა ვთქვა, რომ ქართველი ქალები ყოველთვის იდგნენ მოწოდების სიმაღლეზე, ფრონტის წინა ხაზზე და მომავალშიც ასე გაგრძელდება", - თქვა ოტობარმა.

შეგახსენებთ, 28 ნოემბრიდან, თბილისსა და საქართველოს სხვა ქალაქებში, მათ შორის, ზუგდიდში, პერმანენტული საპროტესტო აქციები იმართება. მოქალაქეები აპროტესტებენ "ქართული ოცნების" გადაწყვეტილებას, საქართველოს ევროკავშირთან მოლაპარაკებების შეჩერების შესახებ.