აფხაზეთის დე ფაქტო რესპუბლიკის უზენაესმა სასამართლომ კახა მურადოვს, რომელსაც ბრალი "სახელმწიფო ღალატში" და "საქართველოს სასარგებლოდ ჯაშუშობაში" ედებოდა, გამამტყუნებელი განაჩენი გამოუტანა. ამის შესახებ ინფორმაციას ოკუპირებული აფხაზეთის ე.წ გენერალური პროკურატურა ავრცელებს.

მათივე ცნობით, ის დამნაშავედ ცნეს სისხლის სამართლის კოდექსის ორი მუხლით - "სახელმწიფო ღალატი" და "ცეცხლსასროლი იარაღის უკანონო ბრუნვა" და მიუსაჯეს 15 წლით თავისუფლების აღკვეთა მკაცრი რეჟიმის სასჯელაღსრულების დაწესებულებაში მოხდით. აქვე აღნიშნულია, რომ მურადოვს არც წინასწარი გამოძიების და არც სასამართლო პროცესის დროს ბრალი არ უღიარებია.

მურადოვის დაკავების შესახებ სოხუმში 2024 წლის 14 მაისს გახდა ცნობილი.  აფხაზეთის ე.წ. უშიშროების სამსახური იტყობინებოდა, რომ მურადოვი აფხაზეთის "მოქალაქეა", ამასთან ერთად, მას ქართული პასპორტიც აქვს. 

დე ფაქტო შსს-მ მისი დაკავებისა და დაკითხვის ვიდეო გამოაქვეყნა. კერძოდ კი, მან "ქართული სპეცსამსახურების წარმომადგენლებთან კავშირებზე" ისაუბრა. 

უწყების მიერ გამოქვეყნებულ ინფორმაციაში ნათქვამია, რომ " მურადოვი, რომელიც 1977 წელს აფხაზეთში დაიბადა, 1994-1999 წლებში საქართველოს შსს-ში მუშაობდა, კონტაქტები ჰქონდა 90-იან წლებში მოქმედი გასამხედროებული დაჯგუფებების, მათ შორის "მხედრიონის" ყოფილ მეთაურებთან".

მათივე მტკიცებით, მურადოვის სახლის ჩხრეკისას "ამოღებულია ტექნიკური საშუალებები, რომლებიც მიუთითებს მის კავშირზე საქართველოს სპეცსამსახურების სასარგებლოდ ჯაშუშურ საქმიანობაზე".

ოკუპირებული აფხაზეთის ე.წ. შსს - მ გამოაქვეყნა მისი "ჩვენება", რომლის თანახმად, მას დავალებული ჰქონდა აფხაზეთში რუსეთიდან შესულ მატარებლებზე თვალთვალი იმის დასადგენად, ხომ არ არიან დატვირთული სამხედრო ტექნიკით და ასევე, დაგეგმილი იყო ინფორმაციის მოსაპოვებლად მისი "ჩანერგვა" აფხაზეთის "სახელმწიფო დაწესებულებებსა და სამხედრო ობიექტებზე". გარდა ამისა, დავალებული ჰქონდა საქართველოსთან აფხაზეთის შეერთების მხარდამჭერი "ლოიალური ადამიანების" მოძებნა და მათთვის ყოფითი პრობლემების მოსაგვარებლად ფინანსური დახმარების სახით დაგეგმილი იყო ერთი მილიონი ლარის გამოყოფა".

საქართველოს შესაბამის სტრუქტურებს მურადოვის დაკავებასთან დაკავშირებით კომენტარი არ გაუკეთებიათ.

ცნობისთვის, 2022 წლის ივლისში "ჯაშუშობის" ბრალდებით გალის რაიონის სოფელ ნაბაკევში დააკავეს ქრისტინე თაკალანძე. აფხაზეთის დე ფაქტო რესპუბლიკის ე.წ. უზენაესმა სასამართლომ თაკალანძეს 10 წლითა და 6 თვით თავისუფლების აღკვეთა 2023 წლის 5 მაისს მიუსაჯა.


ამავე თემაზე: 

სოხუმში აცხადებენ, რომ დააკავეს „საქართველოს სასარგებლოდ ჯაშუშობაში“ ეჭვმიტანილი