წალენჯიხის ადმინისტრაციული ერთეულის, ფახულანის რწმუნებულის ყოფილმა მოადგილემ გოგი გოგოხიამ სოციალურ ქსელში პოსტი გამოაქვეყნა, რომელშიც წერს, რომ "წალენჯიხაში კოალიციური მმართველობა დასრულებულია".

გოგოხიას თქმით, ის სამსახურში რამდენიმე თვიანი კონტრაქტის საფუძველზე აიყვანეს, ვადის ამოწურვის შემდეგ კი ხელშეკრულება არ გაუგრძელეს.

"2021 წლიდან, მეც კოალიციის ნაწილი ვიყავი, თუმცა ისე მოხდა, რომ უკვე აღარ ვიკავებ ფახულანის გამგებლის მოადგილის პოზიციას, მაგრამ არ ვიცი რის გამო. არც არავინ შემხმიანებია. მთელი წალენჯიხის მასშტაბით, მხოლოდ მე ვიყავი, ვისაც არ გაუგრძელდა ხელშეკრულება. გაურკვევლობაში ვარ. ამ ყველაფერში ლომის წვლილი მიუძღვის ივანე ბურდულს. რაც კეთდება ან ფუჭდება, ყველაფერი მისი დამსახურებაა", - ამბობს რადიო "ათინათთან" გოგოხია.

შეკითხვაზე, კონტრაქტის გაგრძელებაზე უარის თქმა არის თუ არა პოლიტიკური მოტივით განპირობებული, გვპასუხობს, რომ ცალსახად ასეა, რადგან, მისივე თქმით, სხვა მიზეზი არ არსებობდა.

აღნიშნულ საკითხთან დაკავშირებით, ჩვენ წალენჯიხის მერის მოვალეობის შემსრულებელს ივანე ბურდულს დავუკავშირდით. ის უარყოფს ბრალდებას, რომ გოგოხიას კონტრაქტი პოლიტიკური მოტივით არ გაუგრძელდა.

მისი თქმით, წელიწად-ნახევრის მანძილზე, გოგოხია არ ცხადდებოდა სამსახურში და ხელშეკრულების განახლებაც სწორედ ამ მიზეზით არ მოხდა.

"ჩვენ, პირიქით, მივესალმებით კოალიციურ მმართველობას. ამისკენ ვართ მოწოდებული. უბრალოდ, წელიწად-ნახევრის განმავლობაში ეს ადამიანი არ დადიოდა სამსახურში. ფახულანში, ვისაც გინდათ ჰკითხეთ, არ იყო ადგილზე. რამდენჯერმე ვთხოვეთ, ადგილზეც იყვნენ მისულები, მაგრამ ის, ძირითადად, თბილისში იყო და არ იყო სამსახურში. ძალიან ბევრი ადამიანია სხვადასხვა პოლიტიკური პარტიიდან მერიაში დასაქმებული და არანაირი პოლიტიკური ნიშნით გათავისუფლება ეს არ ყოფილა", - ამბობს ბურდული.

გოგი გოგოხია ფახულანის რწმუნებულის მოადგილის პოზიციას 2021 წლიდან იკავებდა. ის ასევე იყო პარტია "ლელოს" ადგილობრივი წარმომადგენელიც.