ჩხოროწყუში მოქალაქეებმა კიდევ ერთი პროევროპული აქცია 3 თებერვალს გამართეს. ისინი უერთდებიან საქართველოს მოსახლეობის ნაწილის მოთხოვნას, გათავისუფლდნენ აქციის დროს დაკავებული ადამიანები და დაინიშნოს ხელახალი არჩევნები.

საკრებულოს დეპუტატმა ოთო შენგელიამ რადიო „ათინათთან“ თქვა, რომ აუცილებელია მზია ამაღლობელისა და სხვა პატიმრების „რეჟიმის“ ტყვეობიდან დახსნა, რადგან, როგორც აღნიშნა, ეს ადამიანები საქართველოს ევროპული მომავლისთვის დააკავეს.

„მათ არაფერი არ დაუშავებიათ, გარდა ქვეყნის სიყვარულისა. შეიძლება, ნებისმიერი ჩვენგანი აღმოვჩნდეთ ამ მდგომარეობაში. ამის ჩვენ არ გვეშინია. ეს იყო სწორედ სოლიდარობის აქცია იყო, რასაც პერმანენტული ხასიათი ექნება, დღესაც ჩაინიშნა. ჩვენს საპროტესტო ბანერებზე იყო ციტატები და ისტორიები, რომლებიც საბჭოთა ოკუპაციამ და რუსეთმა დამართა საქართველოს, ქართველების ხელით. მაგალითად, ორჯონიკიძე, სტალინი, ეს ის ხალხი იყო, რომლებმაც საქართველოს გასაბჭოებას შეუწყვეს ხელი. ამ მოვლენებს ასახავდა ეს ბანერებიც. რუსეთი, ტრადიციულად, ნაცად მეთოდებს იყენებს და ქართველების ხელით ანადგურებს საქართველოს ევროპულ მომავალსა და იდენტობას“, - განმარტა შენგელიამ.

მისივე თქმით, გეოპოლიტიკური მოცემულობის გათვალისწინებით, მნიშვნელოვანია, საქართველოს ჰქონდეს მყარი უსაფრთხოების გარანტიები, რაც, შენგელიას განმარტებით, ვერ იქნება ის სახელმწიფო, რომელსაც ქვეყნის 20% უკვე ოკუპირებული აქვს.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში პერმანენტული საპროტესტო აქციები იმართება. მოქალაქეები ამბობენ, რომ ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს. გარდა ამისა, მოსახლეობის ნაწილი არ აღიარებს 2024 წლის 26 ოქტომბრის საპარლამენტო არჩევნების ლეგიტიმაციას და კვლავ მოითხოვს ახალი არჩევნების დანიშვნას.


ამავე თემაზე: 

ჩხოროწყუში მასწავლებლებმა ევროინტეგრაციის პროცესის შეჩერება გააპროტესტეს (ფოტო)

აბა ულა ევროპაშა - აქცია ჩხოროწყუში (ფოტო)