ზუგდიდში, სახელმწიფო რწმუნებულის ადმინისტრაციის შენობის მიმდებარედ პროევროპული საპროტესტო აქციები უკვე 75 დღეა მიმდინარეობს. დღეს, სხვადასხვა ასაკისა და პროფესიის წარმომადგენლები კვლავ შეიკრიბნენ და გააჟღერეს პროტესტის უმთავრესი მოთხოვნები - გათავისუფლდნენ აქციების დროს დაკავებული ადამიანები და დაინიშნოს ხელახალი არჩევნები, შეცვლილი ცენტრალური საარჩევნო კომისიით.

დღესაც, ისევე, როგორც წინა კვირებში, მოქალაქეებს ხელში საპროტესტო შინაარსის ტრანსპარანტები, ასევე, საქართველოსა და ევროკავშირის დროშები ეჭირათ. სიტყვით გამომსვლელებმა კი ქვეყანაში მიმდინარე მნიშვნელოვანი მოვლენები მიმოიხილეს და გააცნეს პროტესტის მონაწილეებს.

ცნობისთვის, 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს. ამ დღიდან საქართველოს სხვადასხვა ქალაქში პერმანენტული პროევროპული საპროტესტო აქციები იმართება.

მოქალაქეების თქმით, საქართველოს ევროპული მომავალი და ევროატლანტიკურ სივრცეში ქვეყნის სრულფასოვანი ინტეგრაცია მოსახლეობის უმრავლესობის ისტორიული არჩევანია, ამ გზიდან გადახვევა კი სახელმწიფოს ღალატია. ისინი კვლავაც მიუთითებენ საქართველოს კონსტიტუციის 78-ე მუხლზე, რომელიც ხელისუფლებას ევროპულ და ევროატლანტიკურ სტრუქტურებში ქვეყნის გაწევრიანებისთვის ყველა ზომის მიღებას ავალდებულებს.