დღეს, 1 მარტს, დაახლოებით 19:30 საათზე, შეიარაღებული თავდასხმა მოხდა გაგრის რაიონში, ცანდრიფშის მე-2 სკოლაში, საარჩევნო უბანზე, რის შედეგადაც დაზიანდა საარჩევნო ყუთი და დოკუმენტები, „აფსნიპრესი“ იწუყება ამის შესახებ.
ამავე ცნობით, თავდამსხმელებმა გაქცევა მანქანებით სცადეს. დევნის დროს დე ფაქტო შსს-ს თანამშრომლებმა მიუსერას საგუშაგო გადაკეტეს. თავმდამსხმელებმა მათი მიმართულებით ცეცხლი გახსნეს. საპასუხო სროლის შედეგად, ერთ-ერთი მანქანის მძღოლმა საჭეზე კონტროლი დაკარგა და თხრილში გადავარდა. სამძებრო სამუშაოები გრძელდება.

გამოცემა „ნუჟნაია გაზეტა“, დამკვირვებლებზე დაყრდნობით იუწყება, რომ „ნიღბიანი პირები შეიჭრნენ საარჩევნო უბანზე, მათ გაისროლეს, გადაატრიალეს საარჩევნო ყუთი, ამოიღეს ბიულეტენების ნაწილი, ზოგს კი წყალი დაასხეს“.

ამავე ცნობით, ბადრა გუნბას შტაბმა მომხდარში ადგურ არძინბას მომხრეები დაადანაშაულა:

„ადგურ არძინბას მხარდამჭერებმა ცეცხლი გაუხსნეს და ემუქრებოდნენ კომისიის წევრებსა და ამომრჩევლებს, ნიღბიანები, შეიჭრნენ მე-2 საშუალო სკოლის მე-14 ოლქის ცანდრიფშის მე-5 უბანზე, დაამტვრიეს საარჩევნო ყუთი და მიმოფანტეს ბიულეტენები“.

ტელეგრამის არხის RESPUBLICA-ს ცნობით, „უცნობმა პირებმა რამდენჯერმე გაისროლეს ერთ-ერთ საარჩევნო უბანზე, რის შედეგადაც დაიჭრნენ ადგურ არძინბას მომხრეები“.

აფხაზეთის დე ფაქტო რესპუბლიკის გენერალური პროკურატურის განცხადებით, ცანდრიფშში, საარჩევნო უბანზე თავდასხმის მონაწილეების დასაკავებლად ზომები მიიღება.

ოკუპირებულ აფხაზეთში დღეს "საპრეზიდენტო" არჩევნების მეორე ტური გაიმართა.