რუსეთის პრეზიდენტი ოკუპირებული აფხაზეთის არჩეულ „პრეზიდენტს“ შეხვდა. ვლადიმირ პუტინმა ბადრა გუნბას ე.წ. არჩევნებში გამარჯვება მიულოცა და მის შედეგს "კარგი" უწოდა.
„ვიცი, რომ საარჩევნო კამპანია საკმაოდ მშფოთვარე და ემოციური იყო. მთავარი ის არის, რომ ხალხი მოვიდა, ხალხმა გამოხატა თავისი სურვილები. თქვენ იცით, რა თქმა უნდა, რუსეთისა და აფხაზეთის განსაკუთრებული ურთიერთობების შესახებ, იცით, რა პრობლემები არსებობს და რა გადაწყვეტილებებს ელოდება ხალხი, ჩვენ ამაზე ვიმუშავებთ", - თქვა პუტინმა.

გუნბამ, თავის მხრივ, მადლობა გადაუხადა პუტინს „აფხაზეთის ხალხის მხარდაჭერისთვის“ და რუსეთს „მთავარი სტრატეგიული მოკავშირე“ უწოდა.

„აფხაზეთის მოსახლეობას ახსოვს ისტორიული გადაწყვეტილება, რომელიც მიიღეს აფხაზეთის სახელმწიფოებრიობის აღიარების შესახებ. ნება მომეცით, აფხაზი ხალხის სახელით მადლობა გადაგიხადოთ ამ გადაწყვეტილებისთვის. რუსეთის ფედერაცია ყოველთვის თანმიმდევრული იყო მის მხარდაჭერაში. ეს ეხება სამხედრო-პოლიტიკურ მხარდაჭერას, სოციალურ და ეკონომიკურ მხარდაჭერას და აფხაზეთის მოსახლეობა, რა თქმა უნდა, გრძნობს მთელ ამ მხარდაჭერას“, - აღნიშნა მან.

გუნბამ შეხვედრაზე, პუტინს რამდენიმე თხოვნით მიმართა, მათ შორის იყო აფხაზეთისთვის, ელექტროენერგიის „ჰუმანიტარული ნაკადის“ მიწოდების გახანგრძლივება.

„ახლა მივედით იქამდე, რომ რესპუბლიკაში შემოსული ჰუმანიტარული ელექტროენერგიის მოცულობა პრაქტიკულად ამოიწურა. ვისარგებლებ შემთხვევით, მინდა გთხოვოთ მხარდაჭერა ენერგეტიკული დეფიციტის დასრულებამდე - ეს არის დაახლოებით აპრილის შუა რიცხვებამდე, - მხარი დაუჭიროთ აფხაზეთს დამატებითი მოცულობის ჰუმანიტარული დახმარებით, ჩვენი ქვეყნისთვის რთული, მწვავე პრობლემების გადასაჭრელად“, - განაცხადა მან.

”კარგი, ჩვენ ყველაფერს გავაკეთებთ”, - უპასუხა პუტინმა.

გუნბამ ორმაგი მოქალაქეობასთან დაკავშირებულ პრობლემაზეც მიუთითა.

„შეთანხმების ძირითადი პროცედურები დასრულებულია და ის რატიფიცირებულია ჩვენი ქვეყნების პარლამენტების მიერ. რჩება იმის მექანიზმის განსაზღვრა, რომელიც შესაძლებელს გახდის, ფაქტიურად დაიწყოს ორმაგი მოქალაქეობის, - რუსეთის მოქალაქეობის მინიჭება აფხაზეთის მოქალაქეებისთვის. თქვენ იცით, რომ თქვენი მხარდაჭერით, ასეთი გადაწყვეტილება იქნა მიღებული და ჩვენი ქვეყნის მოქალაქეების 70 პროცენტზე მეტი რუსეთის ფედერაციის მოქალაქეა. თუმცა, არიან ადამიანები, რომლებსაც არ უსარგებლიათ ამ ტიპის შესაძლებლობებით და თუ ეს შესაძლებელია, ვისურვებდით, რომ სეთი პროგრამა განხორციელდეს“, - განაცხადა ბადრა გუნბამ.

ვლადიმერ პუტინმა აღნიშნა, რომ პროგრამა გაგრძელდება.

„პრინციპში მომზადებულია და ჩვენ გავაგრძელებთ მის განხორციელებას. შესაბამის ინსტრუქციებს გავუგზავნი ჩემს კოლეგებს და ისინი თქვენთან ერთად იმუშავებენ იმ საკითხებზე, რომლებიც შესაძლოა, ჯერ კიდევ საჭიროებს ყურადღებას, მაგრამ ჩვენ გავაგრძელებთ ამ საქმეს“, - განაცხადა რუსეთის პრეზიდენტმა.

„აფსნიპრესის“ თანახმად, მოლაპარაკებები დღეს, 5 მარტს, კრემლში გაიმართა.

1 მარტს ოკუპირებულ აფხაზეთში "საპრეზიდენტო" არჩევნების მეორე ტური გაიმართა, რომელშიც ბადრა გუნბამ გაიმარჯვა, დე ფაქტო ცესკოს მონაცემებით, მან ხმების 54,73%, ხოლო მისმა მეტოქემ, ოპოზიციონერმა ადგურ არძინბამ - 41,54%.

2 მარტს პუტინმა გუნბას გამარჯვება მიულოცა.

ვადამდელი „საპრეზიდეტო“ არჩევნები ოკუპირებულ აფხაზეთში მას შემდეგ დაინიშნა, რაც ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. პასუხად, მაშინ მოსკოვმა სოხუმს სრულად შეუჩერა დაფინანსება.