წალენჯიხის მუნიციპალიტეტში რამდენიმე ლოკაციაზე - ჯვარში, ასევე, კანთისა და ლეხარჩილეს უბნებში ცეცხლის კერები გასულ ღამეს გაჩნდა, რომელიც ამ დროისთვის სრულად ლიკვიდირებულია. ამის შესახებ რადიო „ათინათს“ წალენჯიხის მერის მოადგილემ თამარ ბელქანიამ უთხრა.

მისივე თქმით, ჯვარში ცეცხლი ანძას გაუჩნდა, რის გამოც მოსახლეობის ნაწილს რამდენიმე საათით ელექტროენერგია არ მიეწოდებოდა.

„საკმაოდ რთული ღამე იყო. პირველად ცეცხლი გაჩნდა ანძაზე ჯვარში. ჯვარშივე დაიწვა სახლი, თუმცა, ეს კავშირში არ იყო ხანძართან, რომელიც კარ-მიდამოებს მოედო. შემდეგ ცეცხლის კერა გაჩნდა კანთის და ლეხარჩილეს უბნებში. საკმაოდ დიდ მანძილზე გავრცელდა ხანძარი. მერის მოვალეობის შემსრულებელი ადგილზე გაეცნო ვითარებას და ღამის 4 საათამდე ყველა ლოკაციაზე იმყოფებოდა. დილისკენ შევძელით ცეცხლის ლოკალიზება. ქარი ართულებდა სალიკვიდაციო სამუშაოებს, თუმცა შესაბამისმა სამსახურებმა შეძლეს ცეცხლის ლოკალიზება.

ხანძრის გამომწვევი მიზეზია ის მავნე ტრადიცია, რომ მოსახლეობის ნაწილი გაზაფხულის სახნავისთვის ცდილობს მიწა მოამზადოს ძველი ნათესების დაწვით. შემდეგ მისი კონტროლი ვერ ხდება, ტოვებენ უყურადღებოდ მიწებს. გარდა იმისა, რომ ეს უკიდურესად ტოქსიკური და ჯანმრთელობისთვის მავნებელია, არის კანონით დასჯადი“, - განმარტავს მერის მოადგილე.

ის მოსახლეობას მოუწოდებს, ნუ დაანთებენ საკარმიდამო ნაკვეთებში ცეცხლს, ნუ დატოვებენ კოცონს უყურადღებოდ და დაიცვან უსაფრთხოების ნორმები, რადგან ცეცხლის დიდ ფართობზე გავრცელების ხშირი მიზეზი ადამიანის დაუდევრობაა.


ფოტო: თამარ ბელქანიას FB გვერდი