დღეს, 16 სექტემბერს ქვეყნის მასშტაბით მოქმედ საჯარო და კერძო სკოლებში სასწავლო პროცესი დაიწყო. მათ შორისაა GLC-ის ზუგდიდის განყოფილებაც, სადაც დილით, პირველი ზარის დარეკვამდე, საზეიმო ღონისძიება გაიმართა. მოსწავლეებს სწავლის დაწყება მიულოცეს სკოლის მასწავლებლებმა, დირექტორმა და მშობლებმა. მათ აღნიშნეს GLC-ის მნიშვნელობა მოსწავლეებისთვის განათლების მიღებასა და პიროვნულად ჩამოყალიბებაში. წარმატებული წელი უსურვეს მოსწავლეებს, განსაკუთრებით კი მეშვიდე კლასელებს, რომლებიც სასწავლო წელს პირველად ხვდებიან GLC-ის სივრცეში.

„განსაკუთრებულად მახსენდება ის დღე, როდესაც ამ სკოლაში გადმოვედი. ჩემთვის ერთ-ერთი მოტივაცია იყო განსხვავებული სწავლების მეთოდი, რაც უმეტესწილად გერმანული განათლების სისტემის სტანდარტებზეა აგებული. GLC-ის აქვს გერმანული ტესტი, რომლის წარმატებით ჩაბარების შემთხვევაში, გერმანიის ერთ-ერთ უნივერსიტეტში სრული დაფინანსებით შეძლებ სწავლის გაგრძელებას. ჩემთვის, ასევე, ძალიან მნიშვნელოვანია კლასში მოსწავლეების რაოდენობაც. თავდაპირველად, ვიყავით 8 მოსწავლე, რაც შესაძლებლობას გვაძლევდა ჩვენი უნარები უფრო მეტად გამოგვეჩინა. სკოლაში ინდივიდუალური სწავლების მეთოდი და განათლების მაღალი სტანდარტებია, შესაბამისად მოსწავლეები მაღალ შედეგებს აღწევენ. ვულოცავ მე-7 კლასელებს ამ განსაკუთრებულ დღეს და ვუსურვებ წარმატებულ სასწავლო წელს“, - ამბობს რადიო „ათინათთან“ მე-11 კლასის მოსწავლე ნანა ადამია.

ასეთივე ამაღელვებელი და განსაკუთრებულია დღევანდელი დღე გაბრიელ შეროზიასთვის, რომელიც მოუთმენლად ელოდა თანაკლასელებთან და მასწავლებლებთან შეხვედრას. ის აღნიშნავს, რომ ამ ეტაპზე, მისთვის მნიშვნელოვანია უცხო ენების უკეთ შესწავლა, რადგან სწავლის გაგრძელებას გეგმავს ევროპაში.

„პირველი დღე, როგორც ყოველთვის ამაღელვებელია. მე-11 კლასში გადავედი და ახლა უკვე განსაკუთრებული ყურადღება დაეთმობა ენების შესწავლას, მათ შორის გერმანულსა და ინგლისურს. ეს საინტერესო პროცესი იქნება და მოუთმენლად ველი ახალ სასწავლო წელს. აქ განსხვავებული სწავლების მეთოდია. ასევე, გვაქვს ძალიან მეგობრული გარემო. შეიძლება ითქვას, ყველა ერთი ოჯახის წევრია და ყოველ წელს აღფრთოვანებით ვუბრუნდები სკოლის კედლებს. ბედნიერი ვარ, რომ მე-7 კლასიდან GLC-ში აღმოვჩნდი. იმ დროს ახალ შესაძლებლობებს ვეძებდი, რაც აქ ნამდვილად ვიპოვე. ნაყოფიერ წელს ვუსურვებ იმათ, ვინც ახლა შემოგვიერთდა. წინ დიდი გამოცდილება ელით“, - გვეუბნება გაბრიელი.

მათემატიკის მასწავლებელი ჟანა ბელქანია, რომელიც GLC-ში მე-13 წელია ასწავლის, ამბობს, რომ ეს წელი მისთვის განსაკუთრებულია, რადგან ტექნიკური საგნების მიმართ ინტერესი მზარდია, რაც მის საკლასო ოთახში მათემატიკის შესწავლის მსურველთა დიდი რაოდენობით გამოიხატება.

„გილოცავთ ახალი სასწავლო წლის დაწყებას. გისურვებთ ნაყოფიერ და წარმატებულ სასწავლო წელს. განსაკუთრებით ვულოცავ მე-12 კლასელებს, რომლებიც წელს სკოლას ამთავრებენ და მჯერა, ისინი საუკეთესო შედეგებს აჩვენებენ. ეს თაობა განსაკუთრებულია იმით, რომ მეტად გაცნობიერებულია ტექნოლოგიებში. მათ მეტი შესაძლებლობები აქვთ, ევროპაში სწავლის გაგრძელების კუთხით“, - აღნიშნავს მასწავლებელი.

ცნობისთვის, საქართველოს სასწავლო ცენტრმა GLC-იმ ზუგდიდში 2004 წელს დაიწყო ფუნქციონირება. 20 წლის განმავლობაში მას უამრავი მიღწევა აქვს. ახალგაზრდები თითქმის ყოველ წელს მონაწილეობენ სხვადასხვა პროგრამაში, მათ შორის “Deutsches Sprachdiplom der Kultusministerkonferenz- ში და “FLEX”- ში.