9 მაისს ევროპის დღე აღინიშნება. 75 წლის წინ, ამ დღეს, საფრანგეთის საგარეო საქმეთა მინისტრმა რობერ შუმანმა დეკლარაცია წარადგინა, რომელიც ითვლება ევროპული ინტეგრაციის პროცესის დასაწყისად და ევროკავშირის შექმნის საფუძვლად.

შუმანის დეკლარაციაში გაცხადდა ქვანახშირისა და ფოლადის გაერთიანების შექმნის იდეა, რაც გულისხმობდა ევროპული ქვეყნების ერთი, ზესახელმწიფოებრივი ორგანოს ქვეშ დაკავშირებას. ეს იყო პირველი ნაბიჯი ეკონომიკური და პოლიტიკური ინტეგრაციისკენ, რამაც შემდგომში განაპირობა ევროკავშირის ჩამოყალიბება.

ევროკომისიის პრეზიდენტი ურსულა ფონ დერ ლაიენი ამ დღესთან დაკავშირებით გავრცელებულ ვიდეომიმართვაში ამბობს, რომ შუმანის დეკლარაცია იყო ევროპის ისტორიაში კეთილდღეობისა და მშვიდობის ყველაზე ხანგრძლივი ეპოქის დასაწყისი, ევროპა კი, გლობალური გაურკვევლობის პირობებშიც, რჩება სტაბილურობის საყრდენად ცვალებად მსოფლიოში.

ამასთან, აღნიშნულ თარიღთან დაკავშირებით, საქართველოს მასშტაბით აქცია-მსვლელობები გაიმართება. ზუგდიდში კი, ტრადიციულ ლოკაციაზე, სამეგრელო-ზემო სვანეთის სახელმწიფო რწმუნებულის ადმინისტრაციის წინ, 19:00 საათიდან დაიწყება აქცია სლოგანით „ირო წიმი ევროპაშა“.