ზუგდიდში, “აგენტების” კანონის საწინააღმდეგო აქცია გაიმართა. პროტესტის მონაწილეები დღესაც, ქალაქის ცენტრში შეიკრიბნენ, შემდეგ კი მსვლელობა მოაწყეს ქალაქის ცენტრალური ბაზრის მიმდებარე ტერიტორიისკენ.
პროტესტის ნიშნად, მათ რამდენიმე წუთით, სიმბოლურად გადაკეტეს ქვეითთა გადასასვლელები, ქალაქის ცენტრალურ და მიმდებარე ქუჩებზე.

მიტინგის მონაწილეები შეძახილებით, ბანერებით და საყვირებით მოუწოდებენ თანაქალაქელებს, შეუერთებოდნენ პროტესტს.

მსვლელობა პირველი პრეზიდენტის ძეგლთან დასრულდა.

საქართველოს პარლამენტმა, "უცხოური გავლენის გამჭვირვალობის შესახებ" კანონპროექტი, მესამე მოსმენით, 84 ხმით, 14 მაისს მიიღო. წინააღმდეგ წავიდა 30 დეპუტატი.

შეგახსენებთ, რომ "აგენტების" კანონს სამივე მოსმენით მხარი დაუჭირეს ქალაქ ზუგდიდის ყოფილმა მაჟორიტარმა მერაბ ქვარაიამ, ზუგდიდის მუნიციპალიტეტის ყოფილმა გამგებელმა და მოგვიანებით, მაჟორიტარმა, ედიშერ თოლორაიამ, ხობის ყოფილმა მაჟორიტარმა ირაკლი (დაჩი) ბერაიამ და ქალაქ ფოთის მაჟორიტარმა გიორგი ხახუბიამ.

საქართველოს პრეზიდენტმა სალომე ზურაბიშვილმა „უცხოეთის გავლენის გამჭვირვალობის" შესახებ კანონს ვეტო 18 მაისს დაადო. საპარლამენტო უმრავლესობა კანონპროექტზე ვეტოს დაძლევას მომავალ კვირაში აპირებს.

ამავე თემაზე:

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)