ჟენევის საერთაშორისო მოლაპარაკებების 61-ე რაუნდის მსვლელობისას, 25- 26 ივნისს, აფხაზურმა მხარემ კვლავ დააყენა გალში ინციდენტების პრევენციისა და მათზე რეაგირების მექანიზმის (IPRM) მუშაობის განახლების საკითხი. ინფორმაციას დე ფაქტო რესპუბლიკის საგარეო საქმეთა სამინისტრო ავრცელებს.

ამავე ცნობით, მუშაობა, სტანდარტულად ორ ჯგუფში ჩატარდა - უსაფრთხოებისა და ჰუმანიტარულ საკითხებზე.

ინფორმაციაში ვკითხულობთ, რომ აფხაზური მხარე შეეხო „აფხაზეთის რესპუბლიკის მოქალაქეებისთვის“ გადაადგილების თავისუფლებისა და განათლების, სამედიცინო მომსახურების ხელმისაწვდომობის თემას და რიგ სხვა აქტუალურ პრობლემებს“ და გამოვიდა წინადადებით, რომ შეიქმნას სამუშაო ჯგუფი საერთაშორისო სპეციალისტების ჩართულობით, რომლის მიზანი იქნება „აფხაზური პასპორტებით“, გადაადგილების შესაძლებლობების მოძიება.

ინფორმაციისთვის, ინციდენტების პრევენციისა და მათზე რეაგირების მექანიზმის შეხვედრები გალში, სადაც ქართული მხარე ოკუპირებული აფხაზეთის დე ფაქტო ხელისუფლებასთან ურთიერთობდა, 2018 წლიდან არ ჩატარებულა. ივნისში, ბოლო შეხვედრაზე, აფხაზურმა მხარემ მოითხოვა დღის წესრიგიდან გიგა ოთხოზორიას მკვლელობის საკითხის ამოღება, რაზეც ქართულმა დელეგაციამ უარი განაცხადა, რის შემდეგაც აფხაზურმა და რუსულმა მხარეებმა შეხვედრა დატოვეს. ამის შემდეგ მხარეების შეხვედრა არ გამართულა.

ინციდენტების პრევენციისა და მათზე რეაგირების მექანიზმის (IPRM) მუშაობის განახლების, ასევე გადაადგილების თავისუფლებასთან დაკავშირებული საკითხები სოხუმში მიმდინარე წლის მარტშიც დააყენეს.

2023 წლის დეკემბერში გალის რაიონის ე.წ ადმინისტრაციის ხელმძღვანელმა კონსტანტინე ფილიამ განაცხადა, რომ აფხაზური მხარე ინციდენტების პრევენციისა და მათზე რეაგირების მექანიზმის (IPRM) ფორმატში შეხვედრების ზონას ამზადებს.

ამიერკავკასიაში უსაფრთხოებისა და სტაბილურობის შესახებ ჟენევის საერთაშორისო მოლაპარაკებების მორიგი რაუნდი 2024 წლის დეკემბერში გაიმართება.