დღეს, 18 აგვისტოს "კოალიცია ცვლილებებისთვის" ლიდერებმა ერთობლივი პრესკონფერენცია ზუგდიდში გამართეს, რომელზეც ნიკა მელიამ (პარტია "ახალი"), ზურაბ ჯაფარიძემ ("გირჩი-მეტი თავისუფლება"), ელენე ხოშტარიამ ("დროა") და ნიკა გვარამიამ ("ახალი") კოალიციის ახალი წევრები - ხათუნა სამნიძე ("რესპუბლიკური პარტია") და ოქტაი ქაზუმოვი ("აქტივისტები მომავლისთვის) წარადგინეს.

"ჩვენი კოალიცია სრული სვლით აგრძელებს მოძრაობას 26 ოქტომბრის არჩევნებამდე, რომელზეც პოზიტიურად უნდა აისახოს ქართველი ხალხის ნება მათ მომავალზე. ჩვენს წილ პასუხისმგებლობას ვგრძნობთ. ვთქვით, რომ ყველა ქალაქში, რაიონში და რეგიონში ვიქნებით სულ უფრო მეტნი და გვიხარია, რომ რაც უფრო მეტი დრო გადის, სულ უფრო მეტი თანამებრძოლი, თანამოაზრე, გულშემატკივარი და გუნდის წევრი გვყავს. ჩვენ გვჯერა, რომ 4 ნომერი გახდება სიმბოლო, რომელიც შეძლებს მანკიერი წრის გარღვევას და და ახალი პოლიტიკური კულტურის ჩამოყალიბებას. ძალა მრავალფეროვნებაშია და მიგვაჩნია, დღევანდელი დღეც ამის დასტური იქნება. გვსურს ხალხის ნება აისახებოდეს პოლიტიკაზე და არა მახინჯი პოლიტიკა აისახებოდეს ქართველ ხალხზე", - თქვა ნიკა მელიამ

"დროას" ლიდერმა ელენე ხოშტარიამ განაცხადა, რომ გამარჯვების გზა გადის ერთობაზე, მრავალფეროვნებაზე და ხალხისთვის მომავლის შეთავაზებაზე. მისივე განმარტებით, მათი ერთობა და ძალა შედგება პრინციპული ადამიანებისგან, ფასეულობებისადმი ერთგულებისგან და ქვეყნისთვის მებრძოლი ხალხისგან.

"კოალიცია, რომელიც საზოგადოებას შევთავაზეთ, მართლაც მოიტანს ცვლილებებს და არ მისცემს საშუალებას არავის ქვეყანა იმსახუროს თავად, არამედ იქნება ქვეყნის მსახური. მიხარია, რომ ასეთი პარტია და ადამიანთა ჯგუფი და პოლიტიკოსი უერთდება ჩვენს რიგებს. ეს არის ხათუნა სამნიძე, ადამიანი, რომელიც გამოირჩევა ნებისმიერ სიტუაციაში პრინციპულობით", - აღნიშნა ხოშტარიამ.

"რესპუბლიკური პარტიის" წევრის ხათუნა სამნიძის თქმით, ქვეყანაში მშვიდობა, პროგრესი და ადამიანზე ორიენტირებულობა დაიბადება მაშინ, როდესაც ხელისუფლება შეიცვლება და კოალიციურ მმართველობა იქნება უზრუნველყოფილი,

"მიხარია, რომ ვდგავარ აქ, ისეთ ადამიანებთან ერთად რომლის ბრძოლაც მთელ საქართველოს ნანახი აქვს და მე მათი მჯერა. ბოლო დროს ხშირად ისმის კითხვა როგორ უნდა მართოს ოპოზიციამ 26 ოქტომბრის შემდეგ, პროფესიონალიზმითა და ადამიანის უფლებებზე ორიენტირებული პოლიტიკით, რომელსაც მოიტანს პროგრესი და კოალიცია 4 ნომრით. ქვეყანაში მშვიდობა, მე ვდგავარ ისეთ ადამიანებთან ერთად, რომელთანაც შეიძლება დისკუსია, კამათი და ქვეყნის ისე მართვა, რომ ადამიანი იყოს მთავარი ორიენტირი. მე მოვიგე პირადი ბრძოლა, ახლა დროა, რომ განვკურნოთ ქვეყანა. ამას გავაკეთოთ ერთად, კოალიცია ოთხთან ერთად", - დასძენს ის.

პარტია "ახალის" დამფუძნებელმა ნიკა გვარამიამ ოქტაი ქაზუმოვის წარდგენისას ხაზი გაუსვა სამოქალაქო პატრიოტიზმს, როგორც ყველა ცივილიზებული ერის არჩევანს და მისი განმარტებით, ქაზუმოვი გამორჩეული ქართველი, თავისუფლებისთვის, სიკეთისთვის და განათლებისთვის მებრძოლი ადამიანია.

"მინდა ხაზგასმით აღვნიშნო კოალიციის მთავარი პრინციპი ე.წ ეგრეთწოდებულ უმცირესობებთან დაკავშირებით, იქნება ეს ეთნიკური, შშმ პირები თუ აშ, ჩვენი ამოცანა არ არის ის, რომ პარტიაში მყოფი ეთნიკური თუ სხვა ტიპის უმცირესობების წარმომადგენლები იცავდნენ და წარმოადგენდნენ მხოლოდ მათი თემის უფლებებს. ჩვენი მნიშვნელოვანი ამოცანაა, ჩვენ მათი ინტეგრაცია მოვახდინოთ იმგვარად, რომ ისინი ამ ქვეყნისთვის მნიშვნელოვან საკითხებში გადაწყვეტილებებს იღებდნენ", - ამბობს გვარამია.

რაც შეეხება ოქტაი ქაზუმოვს, მან სიტყვით გამოსვლა მეგრული მისალმებით დაიწყო და განმარტა, რომ მისთვის დიდი პატივია სამეგრელოში, ზუგდიდში ყოფნა. მისი თქმით, ეს ის რეგიონია, რომელმაც ქართულ სახელმწიფოს, საზოგადოებრიობას, კულტურას, სპორტს, პოლიტიკას დიდი სახეები და მამულიშვილები შესძინა.

"დიდი პატივია ვიმყოფებოდე ზუგდიდში, რომელმაც ქართული სახელმწიფოს კულტურით უდიდესი სახეები შესძინა. მე ვიაზრებ ამ პასუხისმგებლობას და ძალიან სიმბოლური ამ კუთხიდან ჩემი და ჩემი გუნდის წარდგენა, რომელსაც ჰქვია "აქტივისტები მომავლისთვის". მასში საქართველოს სხვადასხვა კუთხიდან ეთნიკური აზერბაიჯანელი აქტივისტები ერთიანდებიან, მათ თავიანთი ყოველდღიური შრომით დაამტკიცეს ის, რომ სამშობლოს ერთგულები არიან. დღეს მეამაყება სამეგრელოში ყოფნა. თუნდაც იმიტომ, რომ დიდმა ილიამ, რომელიც აქ ჩამოვიდა, საქართველოს მოდელიც სწორედ აქ, სამეგრელოში დაინახა. ამიტომ, მრავალფეროვნება ნიშნავს საკუთარი იდენტობის შენარჩუნებას, მაგრამ ერთ დიდ პალიტრაში წარმოდგენას ისე, რომ სხვადასხვა ფერით და მრავალფეროვნებით ხასხასებდეს მსოფლიოს ქვეყნებს შორის...დროა გირჩიოთ ახალი, კოალიცია ცვლილებისთვის რესპუბლიკელებთან ერთად და მომავლისთვის", - თქვა მან.

პრესკონფერენციის ბოლოს, პარტია "გირჩი-მეტი თავისუფლების" ლიდერმა ზურაბ ჯაფარიძემ თქვა, რომ კოალიცია ის გუნდია, რომელიც საქართველოს 2030 წლამდე ევროკავშირში შეიყვანს.

ინფორმაციისთვის, "კოალიცია ცვლილებებისთვის" 4 აგვისტოს ჩამოყალიბდა. ის აერთიანებს პარტიებს: "დროა", "ახალი", "გირჩი-მეტი თავისუფლება", "რესპუბლიკური პარტია" და ორგანიზაციას - "აქტივისტები მომავლისთვის". გუნდის წარმომადგენლები რეგიონებში მოსახლეობას ხვდებიან და ელექტორატს 26 ოქტომბრის საპარლამენტო არჩევნებზე მობილიზაციისკენ მოუწოდებენ.