პოლიტიკურმა გაერთიანებამ " კოალიცია ცვლილებებისთვის - გვარამია, მელია, გირჩი, დროა" წინასაარჩევნოდ ზუგდიდში, წალენჯიხაში, ხობში, ჩხოროწყუში, ფოთში და მარტვილში რეგიონული ოფისები გახსნა. ამის შესახებ ინფორმაციას მათ ფეისბუქ გვერდზე ვკითხულობთ.

ზუგდიდის ოფისის გახსნისას, კოალიციის ერთ-ერთმა ლიდერმა ნიკა მელიამ თქვა, რომ ბოლო 30 წლის განმავლობაში ზუგდიდი და სამეგრელო მნიშვნელოვან როლს თამაშობდა თანამედროვე ქართული სახელმწიფოს განვითარებაში და ეს არის ადგილი, რომელსაც არა მხოლოდ სურდა, არამედ განაპირობებდა ცვლილებებსაც.

"გაცილებით მეტნი ვართ ადამიანები ვისაც გვსურს კოალიციური მმართველობა, ბედნიერი ახალგაზრდობა, ვისაც სურს რომ მშობლები არ მიდიოდნენ ქვეყნიდან. კოალიცია 4 ნომრით ამ ბრძოლაში მნიშვნელოვან სიტყვას იტყვის. ჩვენ ვფიქრობთ, რომ უდიდესი განსხვავება ნომერ 4-სა და სხვა პლატფორმებს შორის. ჩვენ ვართ გავლენებისგან თავისუფალი და ანგარიშვალდებული მხოლოდ ამომრჩევლის წინაშე. ამ გუნდს აქვს უნარი დაიცვას საკუთარო სიტყვა და იყოს თანმიმდევრული", - აღნიშნა მან.

ნიკა გვარამიას თქმით, სამეგრელო საქართველოს ყველაზე ევროპული ნაწილია და ზუგდიდით დაიწყება საქართველოს გაერთიანება, ევროპისკენ სვლა.

"ეს არის ადგილი, რომელიც რაც არ უნდა ხდებოდეს საქართველოში არასდროს არცერთი ნაბიჯით არ გადასულა ერთიანი საქართველოს მაგისტრალიდან, ეს არის ევროპული საქართველოს ყველაზე ევროპული ნაწილი, საქართველოს კარიბჭე ევროკავშირია. მე ვამაყობ ამ კუთხით და მაქვს ამ კუთხის დიდი იმედი, იმაში რომ იქნება მთავარი და ყველაზე სწორი გადაწყვეტილების ინიციატორი. ევროპის კარიბჭე არის აქ და ჩვენ ქართველები ვიმსახურებთ უკეთესს", - თქვა მან.

კოალიციის ერთ-ერთმა ლიდერმა ზურაბ ჯაფარიძემ თქვა, რომ ხუთ წელიწადში ქვეყანა ევროკავშირის წევრი გახდება და ახალგაზრდები მიიღებენ იმ სიკეთეებს, რაც გაწევრიანებას თან ახლავს, მათ შორის ევროპულ განათლებას და ჯანდაცვას.

"ჩვენ ვიბრძვით იმისთვის, რომ ახალგაზრდები და ბავშვები, რომლებიც ახლა აქ დგანან, ამათ ხუთ წელიწადში ჯიბეში ჰქონდეთ ევროკავშირის პასპორტი, რომ 5 წელიწადში მომავალი თაობა გახდნენ მსოფლიოს ნომერ პირველი მოქალაქეები. ერთადერთი ვინც ამას წინ უდგას, ეს არის მილიარდერი, რომელიც უღობავს ამ პროცესს გზას. ხუთ წელიწადში ეს ქვეყანა გახდება ევროკავშირის წევრი, ეს ახალგაზრდები გახდებიან ევროკავშირის სრულფასოვანი მოქალაქეები და მიიღებენ ყველა იმ სიკეთეს, რაც ამას თან ახლავს, ევროპულ განათლებას, ჯანდაცვას. თუ დასჭირდებათ სადმე სწავლა, მუშაობა, მოგზაურობა, ყველგან იქნებიან მსოფლიოს პირველხარისხოვანი მოქალაქეები. ეს არის ის ბრძოლა, რომელსაც ჩვენ აუცილებლად მოვიგებთ 26 ოქტომბერს და ეს არის გუნდი, რომელიც ამ ქვეყანას შეიყვანს ევროკავშირში"- განმარტა ჯაფარიძემ.

კოალიციას სამოქალაქო მოძრაობას "სამეგრელოს ხმის" ლიდერი თენგიზ ჯგუშიაც შეუერთდა. მან ზუგდიდის ოფისის გახსნისას მხარდამჭერებს სიტყვით მიმართა.

სამეგრელოში გაერთიანების ოფისების მისამართებია: ზუგდიდი - რუსთაველის 52, ფოთი - 26 მაისის N4, ჩხოროწყუ - ჭავჭავაძის ქუჩა N7, ხობი - ცოტნე დადიანის N208, მარტვილი - ზვიად გამსახურდიას N10, წალენჯიხა - ფიროსმანის N11.