„მოწინააღმდეგეები ცდილობენ აფხაზეთი რუსეთს „მოწყვიტონ“,  - ამის შესახებ „როსსოტრუდნიჩესტვოს“ ხელმძღვანელმა ევგენი პრიმაკოვმა „რია ნოვოსტის“ განუცხადა. 

„ჩვენთვის ცხადია, რასაც ჩვენი ოპონენტები და კონკურენტები აკეთებენ, მათ უნდათ აფხაზეთი ჩამოაშორონ რუსეთს, ძალიან აქტიურად მუშაობენ და ამაში უზარმაზარ რესურსებს დებენ, ამას უნდა დავნებდეთ? რა თქმა უნდა, არა“, - აღნიშნა მან.

მან ხაზგასმით აღნიშნა, რომ ოკუპირებულ აფხაზეთში “როსსოტრუდნიჩესტვოს“ წარმომადგენლობა აქტიურად მუშაობს, კერძოდ სოხუმსა და გალის რაიონში, ხოლო აფხაზი სტუდენტები სასწავლებლად რუსეთში მიდიან. მისივე მტკიცებით, დე ფაქტო რესპუბლიკაში სააგენტოს მუშაობაზე გავლენის მოხდენის მცდელობები არ დაფიქსირებულა.

ინფორმაციისთვის, 1 სექტემბრიდან მოსკოვმა სოხუმს დაფინანსება შეუჩერა. ამის შესახებ აფხაზეთის დე ფაქტო რესპუბლიკის ე.წ. საგარეო საქმეთა მინისტრმა სერგეი შამბამ განაცხადა. მიზეზად აფხაზეთის ე.წ. მთავრობის მიერ გარკვეული ვალდებულებების შეუსრულებლობა სახელდება.

“როსსოტრუდნიჩესტვო“ (რუსეთის ფედერაციის დამოუკიდებელ სახელმწიფოთა თანამეგობრობის, საზღვარგარეთ მცხოვრები თანამემამულეების და საერთაშორისო ჰუმანიტარული თანამშრომლობის) წარმომადგენლობა სოხუმში 2009 წლის 18 დეკემბერს გაიხსნა. აფხაზური მედიის თანახმად, მისი მთავარი ამოცანაა „რუსეთის ფედერაციასა და აფხაზეთს შორის კულტურული, საგანმანათლებლო, სამეცნიერო, ტექნიკური და საინფორმაციო კავშირების განვითარება, კულტურული და საგანმანათლებლო საქმიანობა".