აფხაზეთის დე ფაქტო რესპუბლიკის პარლამენტი უახლოეს სესიაზე განიხილავს „რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ“ შეთანხმების რატიფიცირების საკითხს. ამის შესახებ გადაწყვეტილება აფხაზმა „დეპუტატებმა“ 8 ნოემბრის სხდომაზე მიიღეს, წერს „აფსნიპრესი“.

„აფხაზეთში რუსული საინვესტიციო პროექტების მინიმალური ზღვარი 2 მილიარდი რუბლი არის მთავარი დამცავი მექანიზმი, რომელსაც ითვალისწინებს მთავრობათაშორის შეთანხმება“, - განაცხადა ეკონომიკის ე.წ. მინისტრმა ქრისტინა ოზგანმა პარლამენტის კომიტეტის სხდომაზე.

მისი განმარტებით, „საპარლამენტო ცვლილებები“ ითვალისწინებს საქმიანობის სფეროების დიფერენცირებას და ინვესტიციების მოცულობის შემცირებას მინიმუმ 500 მლნ-მდე სოფლის მეურნეობისთვის და მილიარდამდე პროექტებისთვის სხვა სფეროებში.

ოზგანმა აღნიშნა, რომ "უწყებას, პირიქით, სურდა ამ თანხის გაზრდა, რათა შეეზღუდა ხელშეკრულებით გათვალისწინებული პროექტების რაოდენობა, იმისთვის, რომ ადგილობრივ ბიზნესს არ შექმნოდა კონკურენტული პირობები“.

გამოცემის ცნობით, „დეპუტატმა“ ლეონიდ ლაკერბაიამ აღნიშნა, რომ რუსი ინვესტორები, სავარაუდოდ, სესხებს ისევ რუსული ბანკებიდან აიღებენ და რადგან ეს სახელმწიფო სახსრებია, ისინი უნდა გაკონტროლდეს.

„ჩვენ არ გვაქვს ასეთი შესაძლებლობა, რომ ჩვენმა ხალხმა აიღოს ეს სესხები. იქ ისეთი პროცენტებია, რომ არ ვისურვებდი ვინმეს ამ პირობებით ეწარმოებინა ბიზნესი“, - განაცხადა ლაკერბაიამ და დასძინა, რომ მზად არის ხმა მისცეს შეთანხმების რატიფიკაციას, თუ საქმე ეხება ისეთ საქმიანობას, როგორიცაა მრავალფუნქციური კომპლექსების მშენებლობა.

მან შეკრებილებს გაახსენა, რომ „პარლამენტმა“ ცოტა ხნის წინ განიხილა და ფაქტობრივად, უარყო აპარტამენტების შესახებ კანონპროექტი.

საბოლოოდ, "დპუტატები" შეთანხმდნენ, რომ რუსეთთან საინვესტიციო ხელშეკრულების რატიფიცირების საკითხს, უახლოეს სესიაზე გაიტანენ განსახილველად. 

ოქტომბრის ბოლოს სოხუმმა ხელი მოაწერა მოსკოვის მიერ მოთხოვნილ კიდევ ერთ შეთანხმებას, რომელიც რუსულ კომპანიებს აფხაზეთში საინვესტიციო პროექტების განხორციელების საშუალებას აძლევს.

დოკუმენტის ძალაში შესვლის პროცედურა ითვალისწინებს ე.წ. პარლამენტში მის სავალდებულო რატიფიცირებას.

აფხაზური ოპოზიციის ნაწილი ამ დოკუმენტის წინააღმდეგ გამოდის და მიაჩნია, რომ ეს გამოიწვევს "ოლიგარქიის გაფართოებას".

„სესიის დღე, რომელზეც მისი ბედი გადაწყდება, მალე გახდება ცნობილი. ეს დღე იქნება თითოეული ჩვენგანისთვის მთავარი გამოცდა აფხაზეთისა და მისი დამოუკიდებლობის დაცვაში", - ამის შესახებ იუთუბ არხზე “Апсны Хабар” იუწყება კანონპროექტის რატიფიცირების მოწინააღმდეგეთა შტაბი.

ცნობისთვის, 1 სექტემბრიდან მოსკოვმა შეაჩერა ოკუპირებული აფხაზეთის ბიუჯეტის დაფინანსება, მათ შორის, საინვესტიციო ხელშეკრულების დამტკიცების მოთხოვნით.