დღეს, 29 ნოემბერს, ზუგდიდში 14:00 საათზე სამეგრელო-ზემო სვანეთის სამხარეო ადმინისტრაციის შენობის წინ სამოქალაქო აქტივისტებმა და არასამთავრობო ორგანიზაციების წარმომადგენლებმა საპროტესტო აქცია დააანონსეს. მოქალაქეების ნაწილის პროტესტი უკავშირდება პრემიერ-მინისტრის ირაკლი კობახიძის განცხადებას, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს.


28 ნოემბერს, საღამოს კობახიძის ბრიფინგის შემდეგ, საქართველოს სხვადასხვა ქალაქში, მოქალაქეები ქუჩაში გამოვიდნენ და ქვეყნის დასავლური კურსიდან გადახვევა გააპროტესტეს.

პროტესტს ზუგდიდშიც შეუერთდნენ, აქციის მონაწილეები სამხარეო ადმინისტრაციის შენობასთან შეიკრინენ, შემდეგ კი მსვლელობით გაემართნენ აღმაშენებლის ქუჩაზე, ქალაქის შემოსასვლელისკენ, სადაც დროებით გზა გადაკეტეს. მათი თქმით, საქართველოს ევროპული მომავალი, ქვეყნის ისტორიული არჩევანია და ისინი არ დაუშვებენ ქვეყნის რუსეთიზაციას. 

თბილისში, შინაგან საქმეთა სამინისტროს დანაყოფებმა რუსთაველის გამზირზე მიმდინარე აქცია ძალის გამოყენებით დაშალეს. პროფესიული მოვალეობის შესრულებისას, პოლიციამ ფიზიკურად იძალადა ჟურნალისტებზე და ოპერატორებზე. დაშავებულებს შორის არიან სამოქალაქო აქტივისტები, მოქალაქეები და პოლიტიკოსები.

ევროკავშირთან მოლაპარაკებების გახსნაზე "ქართული ოცნების" უარის შემდეგ, საქართველოს პრეზიდენტმა სალომე ზურაბიშვილმა, ოპოზიციური პარტიების წარმომადგენლებთან შეხვედრის შემდეგ, ორბელიანების სასახლეში ბრიფინგი გამართა. მან სიტყვით გამოსვლისას მიმართა საზოგადოებას, რომ არ დაკარგონ იმედი და არ ჩაიკლან პროტესტის გრძნობა. ის ასევე პარლამენტის შენობის წინ შეკრებილ დემონსტრანტებთან მივიდა. აქციის მონაწილეებთან შეხვედრის შემდეგ კი გაემართა თავისუფლების მოედნისკენ და იქ განლაგებულ სპეცდანიშნულების რაზმს უთხრა, რომ მათი მოვალეობა ქვეყნის სახელმწიფოებრიობისა და მოქალაქეების დაცვაა.


ამავე თემაზე: 

ვაპროტესტებთ საქართველოს რუსეთიზაციას, - ზუგდიდში აქციის მონაწილეებმა მსვლელობა გამართეს (ფოტო)

ეს არის წინააღმდეგობის მოძრაობა და მე ვიქნები პრეზიდენტი ბოლომდე, - სალომე ზურაბიშვილი

ზუგდიდში, სამხარეო ადმინისტრაციის წინ, საპროტესტო აქცია იმართება (ფოტო)