ზუგდიდში, სამხარეო ადმინისტრაციის წინ აქცია იმართება. მოქალაქეები, სამოქალაქო აქტივისტები და ოპოზიციონერი პოლიტიკოსები, მეორე დღეა იკრიბებიან და „ქართული ოცნების“ გადაწყვეტილებას აპროტესტებენ, ევროკავშირთან 2028 წლამდე მოლაპარაკებების შეჩერების შესახებ.

ადგილზე მობილიზებულია პოლიცია. ამ წუთებში მათ მიმართავს „ახალის“ წევრი და საკრებულოს ოპოზიციონერი დეპუტატი მაია კალანდია:

"იმედია არ დაუპირისპირდებით ქართველ ხალხს, არ დაგვიპისპირდებით ჩვენ, რადგანაც თუ 1989 წლიდან დავიწყებთ ისტორიას და დარწმუნებული ვარ, ყველამ კარგად იცით, იქ სადაც მილიცია დაუპირისპირდა ხალხს, ყოველთვის ბრძოლა პოსტსაბჭოთა ქვეყანაში დასრულდა ხალხის გამარჯვებით, ჩვენ არ გვინდა თქვენზე გამარჯვება ქართველი ერის და ჩვენი სახელმწიფოს გამარჯვებ". - განაცხადა მან. 


მაია კალანდია პოლიციელებს მიმართავს

აქციას უერთდებიან მოქალაქეები ჩხოროწყუდან და წალენჯიხიდან.

28 ნოემბერს, მას შემდეგ, რაც ირაკლი კობახიძემ, „ქართული ოცნების“ სახელით გააკეთა განცხადება, ევროკავშირთან მოლაპარაკებების დღის წესრიგიდან ამოღების შესახებ, მოქალაქეები ქუჩაში გამოვიდნენ. მასშტაბური აქცია გაიმართა თბილისში, რუსთაველის ქუჩაზე. პარალელურად პროტესტს შეუერთდნენ, საქართველოს სხვა რეგიონებსა და ქალაქებში, მათ შორის ზუგდიდში.

თბილისში, შინაგან საქმეთა სამინისტროს დანაყოფებმა რუსთაველის გამზირზე მიმდინარე აქცია ძალის გამოყენებით დაშალეს. პროფესიული მოვალეობის შესრულებისას, პოლიციამ ფიზიკურად იძალადა ჟურნალისტებზე და ოპერატორებზე. დაშავებულებს შორის არიან სამოქალაქო აქტივისტები, მოქალაქეები და პოლიტიკოსები. საქართველოს პრეზიდენტი სალომე ზურაბიშვილი თბილისში, პარლამენტის შენობის წინ შეკრებილ დემონსტრანტებთან მივიდა. აქციის მონაწილეებთან შეხვედრის შემდეგ კი გაემართა თავისუფლების მოედნისკენ და იქ განლაგებულ სპეცდანიშნულების რაზმს უთხრა, რომ მათი მოვალეობა ქვეყნის სახელმწიფოებრიობისა და მოქალაქეების დაცვაა.