სახალხო დამცველის აპარატის რეგიონული წარმომადგენელი ლევან პაპავა , ფეისბუკის საკუთარ გვერდზე პოსტს აქვეყნებს, რომელშიც ემიჯნება „ქართული ოცნების“ გადაწყვეტილებას, ევროკავშირთან მოლაპარაკებების შეჩერების შესახებ.

„ხელისუფლების უარი ევროკავშირთან მოლაპარაკების გახსნაზე (რამდენი ხნით, ამას უკვე მნიშნველობაც არ აქვს) რა თქმა უნდა არის ყველაზე მოღალატეობრივი, რაც აქამდე გვინახავს და იმაზე მეტად ამაზრზენი, ვიდრე უწიგნური და იმავდროულად უინტელექტო, არშემდგარი ძველი ბიჭი ყაველაშვილის საპრეზიდენტო კანდიდატად წარდგენა. გუშინდელ აქციაზე მომხდარ სისხლის სამართლის დანაშაულზე ვიმედოვნებ, რომ ყველა ორგანიზატორს თუ აღმსრულებელს მოუწევს სამართლებრივი და პოლიტიკური პასუხიგება“, - წერს პაპავა.

28 ნოემბერს, მას შემდეგ, რაც ირაკლი კობახიძემ, „ქართული ოცნების“ სახელით გააკეთა განცხადება, ევროკავშირთან მოლაპარაკებების დღის წესრიგიდან ამოღების შესახებ, მოქალაქეები ქუჩაში გამოვიდნენ. მასშტაბური აქცია გაიმართა თბილისში, რუსთაველის ქუჩაზე. პარალელურად პროტესტს შეუერთდნენ, საქართველოს სხვა რეგიონებსა და ქალაქებში, მათ შორის ზუგდიდში.