ზუგდიდში, დღეს, 7 დეკემბერს, 17 საათზე, საპროტესტო აქცია გაიმართება. ორგანიზატორების ინფორმაციით, მოქალაქეები, ქალაქის ცენტრში, სახელმწიფო რწმუნებულის ადმინისტრაციის შენობის წინ ისევ შეიკრიბებიან.
ამავე ცნობით, დღევანდელი აქციის სლოგანია „სოლიდარობა რეჟიმის პატიმრებს“.  ის, როგორც ვკითხულობთ, განსხვავებული ფორმატით ჩატარდება, დაუკრავენ ელექტრონული მუსიკის შემსრულებლები. 

ზუგდიდში, მოქალაქეები, მათ შორის, სამოქალაქო აქტივისტები, სტუდენტები, აბიტურიენტები და ოპოზიციური პარტიების წარმომადგენლები, „ქართული ოცნების“ მიერ ევროკავშირთან მოლაპარაკებების გახსნის 2028 წლამდე შეჩერებას 9 დღეა აპროტესტებენ.

28 ნოემბრიდან, ხალხმრავალი დემონსტრაციები იმართება თბილისსა და საქართველოს სხვადასხვა ქალაქში.

მათი მონაწილეების განცხადებით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.

ცნობისთვის, შინაგან საქმეთა სამინისტროს ინფორმაციით, 6 - 7 დეკემბრის ღამეს, რუსთაველის გამზირზე მიმდინარე პროევროპულ აქციაზე 48 ადამიანი, ხოლო სულ, 9 დღის თავზე, „პოლიციის კანონიერი მოთხოვნის დაუმორჩილებლობისა და წვრილმანი ხულიგნობის“ მუხლებით 386 პირია დაკავებული.