ჩხოროწყუს მუნიციპალიტეტში 40-მდე მასწავლებელმა საქართველოს ხელისუფლების გადაწყვეტილება, 2028 წლამდე შეაჩეროს ევროპულ და ევროატლანტიკურ სტრუქტურებში ინტეგრაცია, იაკობ გოგებაშვილის სკვერში გააპროტესტა.

მათ ხელში საქართველოსა და ევროკავშირის დროშები, ასევე, ბანერი წარწერით "ჩხოროწყუს მასწავლებლები საქართველოს გადასარჩენად" ეჭირათ.

მათი თქმით, რთულია ქვეყანაში მიმდინარე პროცესებს უყურებდე და პროტესტის გრძნობა არ გაგიჩნდეს.

ამასთან, შეკრებილებმა თბილისში მშვიდობიანი პროტესტის მონაწილეებზე განხორციელებული ფიზიკური ძალადობა და მათი დაპატიმრება დაგმეს.

"დაახლოებით, 40 მასწავლებელი, საგაკვეთილო პროცესის დაწყებამდე გამოვიდა ამ დილით და დავგმეთ ძალადობა, გვინდა და მოვითხოვთ არალეგიტიმური ხელისუფლებისგან, გაათავისუფლონ უკანონოდ დაპატიმრებული ახალგაზრდები, რომელთა შორის ჩვენს მიერ აღზრდილი, ყოფილი მოსწავლეები არიან. ნებისმიერი ადამიანის მიმართ გამოვხატავთ თანაგრძნობას, რადგან ჩვენც გვაწუხებს ჩვენი სამშობლოს ბედი. ჩვენი სკოლაში მისვლის უმთავრესი მიზანი, გარდა იმისა, რომ მოსწავლეს საგანი ვასწავლოთ და ცოდნა გავუზიაროთ, არის, გავზარდოთ ისინი მოქალაქეებად, რომელსაც უნდა შეეძლოს, გაარჩიოს თეთრი და შავი, იდგნენ სწორ მხარეს, როდესაც მსგავსი განუკითხაობა ხდება და ირღვევა კონსტიტუცია", - თქვა რადიო "ათინათთან" ქართული ენისა და ლიტერატურის მასწავლებელმა ირმა ჯალაღონიამ.

დღეს, საქართველოს სხვადასხვა ქალაქში, მათ შორის ზუგდიდსა და ჩხოროწყუში მოქალაქეები ევროპული გზიდან გადახვევას კვლავ გააპროტესტებენ. მათი თქმით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.


ამავე თემაზე: 

აბა ულა ევროპაშა - აქცია ჩხოროწყუში (ფოტო)