ასლან ბჟანია მომავალ რიგგარეშე “საპრეზიდენტო" არჩევნებში კანდიდატად არ წარდგება, ამის შესახებ რუსულ პროპაგანდისტულ გამოცემა „ინტერფაქსს“ ე.წ. პრეზიდენტის ადმინისტრაციის წყარომ განუცხადა.
„შესაძლოა, ვიცე-პრეზიდენტმა, ამჟამად, კი აფხაზეთის პრეზიდენტის მოვალეობის შემსრულებელმა, ბადრა გუნბამ წამოაყენოს თავისი კანდიდატურა არჩევნებში“, - ვკითხულობთ ინფორმაციაში.

„ეხო კავკაზს“ თანახმად, ინფორმაცია „ოფიციალურად“ არავის დაუდასტურებია.

ამავე ცნობით, დე ფაქტო ცენტრალური საარჩევნო კომისიის წყარომ განაცხადა, რომ „პრეზიდენტობისთვის“ ხუთი ამ ექვსი კანდიდატი იბრძოლებს.
შესაძლო კანდიდატებს შორის „ინტერფაქსის“ წყარომ დაასახელა:

„პრეზიდენტის“ მოვალეობის შემსრულებელი, ბადრ გუნბა, ოპოზიციის ერთ-ერთი ლიდერი - ადგურ არძინბა, რუსეთის ფედერაციაში „აფხაზეთის სავაჭრო პალატის“ წარმომადგენელი ოლეგ ბარციცი, ასევე „კონტროლის პალატის“ ყოფილი ხელმძღვანელი - რობერტ არშბა.

აქვე აღნიშნულია, რომ ჩამონათვალს, შესაძლოა კიდევ ერთი ან ორი კანდიდატის დაემატოს.

მანამდე, ნოემბრის ბოლოს, ბჟანიამ განაცხადა, რომ „საპრეზიდენტო“ არჩევნებში საკუთარ კანდიდატურას დააყენებს. 

აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან 19 ნოემბერს გადადგა. პოსტი დატოვა “პრემიერ-მინისტრმა” ალექსანდრე ანქვაბმაც.

15 ნოემბერს აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“. 

მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი. 

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის დაფინანსება.

შეგახსენებთ, რომ ოკუპირებულ აფხაზეთში ე.წ. საპრეზიდენტო არჩევნები 2025 წლის 15 თებერვალს გაიმართება.