ზუგდიდში სხვადასხვა თაობისა და სფეროს წარმომადგენლები, სტუდენტები, მოსწავლეები, სამოქალაქო სექტორის წევრები, პოლიტიკოსები და ის მოქალაქეები, რომლებიც საქართველო-ევროკავშირის სტრატეგიული ურთიერთობების შეფერხებას აპროტესტებენ, მე-18 დღეა, სახელმწიფო რწმუნებულის ადმინისტრაციის წინ იკრიბებიან.

დღესაც, დემონსტრანტებს ხელში საქართველოსა და ევროკავშირის დროშები, ასევე პროტესტის გამომხატველი სხვადასხვა ბანერი ეჭირათ, სიტყვით გამოსვლების დასასრულს კი, შეეძლოთ, ადგილზე დამონტაჟებულ დიდ ეკრანზე თბილისში მიმდინარე აქციის პირდაპირი ტრანსლაცია ენახათ.

აქციის მონაწილეების თქმით, ქვეყნის დასავლური კურსიდან გადახვევა სახელმწიფოსა და წინაპრების მიერ დატოვებული მემკვიდრეობის ღალატია. ისინი ყურადღებას ამახვილებენ კონსტიტუციის 78-ე მუხლის დარღვევაზე, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.

"უკვე უპრეცედენტო შემთხვევა დაფიქსირდა საქართველოს ისტორიაში, როდესაც მე-18 დღეა უწყვეტი პროტესტია საქართველოს ქუჩებში. ეს არის ნამდვილი ხალხის ძალა, რომლებსაც გვიყვარს ჩვენი ქვეყანა და არ გვინდა, რომ ის ისევ რუსეთის კლანჭებში აღმოჩნდეს. ჩვენ გვინდა ევროკავშირი და იმიტომ ვდგავართ ამ სიცივეში და ყინვაში, რათა დავიცვათ ევროპული მომავალი. უკვე ნათელია, საქართველომ გეზი ჩრდილოეთისკენ აიღო. მიდის მოლაპარაკებები ევროკავშირის რამდენიმე ქვეყანაში, რომ შეგვიწყდეს უვიზო რეჟიმი. ძალიან ბევრი ადამიანია საქართველოში, რომელთა ოჯახის წევრი მუშაობს ევროპაში. უნდა დაისაჯონ ის ადამიანები, რომლებმაც მცირედი წვლილიც კი შეიტანეს არჩევნების გაყალბებაში. ვითხოვთ, ევროკავშირმა დაასანქციროს ბიძინა ივანიშვილი და მისი გუნდი. მე ვარ თსუ-ის სტუდენტი და დაახლოებით 10-15 დღის წინ, უნივერსიტეტის ეზოში ღამეს ვათევდით, ასე ვითხოვდით, ჩვენი უნივერსიტეტი დაჰბრუნებოდა ხალხს, რადგან ვნახეთ, რომ, როდესაც აქციები დაიწყო, სწორედ უნივერსიტეტის ეზოდან მოხდა სპეცრაზმის გამოყვანა და უნივერსიტეტის ეზოში არ გვიშვებდნენ სტუდენტებს. როდესაც უსამართლობასთან ბრძოლა გვიწევს, არ აქვს მნიშვნელობა სიცივე იქნება თუ არა, ჩვენ გამოვალთ გარეთ", - სიტყვით გამოსვლისას აღნიშნა აქციის მონაწილემ, სტუდენტმა ლუკა მებონიამ.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში საპროტესტო აქციები იმართება. ზუგდიდში მოქალაქეების ნაწილი 28 ნოემბრიდან აპროტესტებს ხელისუფლების გადაწყვეტილებას.

ამავე თემაზე:

აქცია და მსვლელობა ზუგდიდში - პროტესტის მე - 17 დღე (ფოტო)

პროტესტის მე -15 დღე - აქცია და მსვლელობა ზუგდიდში (ფოტო)

ყოველდღე ქვეყნის სამსახურში - ზუგდიდში აქცია მიმდინარეობს (ფოტო)

„გაიფიცე“, - ახალგაზრდების აქცია ზუგდიდის მერიასთან

"საქართველო არასოდეს არ იქნება რუსეთი", - პროტესტის მე -14 დღე ზუგდიდში (ფოტო)

ევროპა საქართველოს უალტერნატივო მომავალია - საპროტესტო მსვლელობა ზუგდიდში (ფოტო)

მშობლებს არ გავუზრდივართ რუსული მომავლისთვის - ზუგდიდის სკოლების მოსწავლეებმა საპროტესტო მსვლელობა მოაწყეს