დღეს, 20 დეკემბერს, „კოალიცია ცვლილებებისთვის“ ახალგაზრდული ორგანიზაციის წარმომადგენლები ზუგდიდის მუნიციპალიტეტის მერიის შენობასთან შეიკრიბნენ და ქვეყანაში მიმდინარე მოვლენები, მათ შორის EU-სთან მოლაპარაკებების 2028 წლამდე შეჩერება გააპროტესტეს.

ახალგაზრდებს ხელში პოსტერები ეჭირათ, წარწერით „გაიფიცე“. ისინი რადიო „ათინათთან“ ამბობენ, რომ საჯარო მოხელეებს მოუწოდებენ, გაეფიცონ არალეგიტიმურ ხელისუფლებას, რომელმაც, მათი თქმით, ძალაუფლება უკანონოდ მიიტაცა.

მოგვიანებით, მათმა პროტესტმა ქალაქის მთავარ ნაძვის ხესთან გადაინაცვლა, სადაც საპროტესტო შინაარსის რუსული წარწერები გამოფინეს და ადგილობრივი ხელისუფლების მიერ ქვეყანაში მიმდინარე პროცესების უგულებელყოფა დაგმეს.

ცნობისთვის, მას შემდეგ, რაც საქარართველოს პრემიერ-მინისტრმა ირაკლი კობახიძემ 28 ნოემბერს განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში უწყვეტი საპროტესტო აქციები იმართება.