რუსეთის პრეზიდენტის აღმასრულებელი აპარატის  უფროსის პირველი მოადგილე სერგეი კირიენკო სოხუმში „სამუშაო ვიზიტის“ ფარგლებში აეროპორტს ეწვია და მონაწილეობა მიიღო რუსეთსა და აფხაზეთს შორის საჰაერო მიმოსვლის გახსნის შესახებ შეხვედრაში.

აეროპორტის რეკონსტრუქციისა და მშენებლობის საკოორდინაციო შტაბის ხელმძღვანელმა, „პრეზიდენტობის“ კანდიდატმა, ბადრა გუნბამ მას თხოვნით მიმართა, დახმარება გაუწიოს რუსეთ-აფხაზეთს შორის მუდმივი საჰაერო მიმოსვლის ზაფხულის ტურისტული სეზონის დაწყებამდე ორგანიზებაში, წერს "აფსადგილ ინფო".

"ნამდვილად, აეროპორტი ფუნდამენტურად მნიშვნელოვანი პროექტია", - თქვა კირიენკომ. მან აღნიშნა, რომ რეგულარული საჰაერო მიმოსვლის დაწყება მიმდინარე წლის 1 მაისს დაიგეგმა.

"რეგულარული საჰაერო მიმოსვლის დაწყება და პირველი ფრენები არის ის, რაზეც აფხაზეთსა და რუსეთში ხალხი დიდი ხანია ოცნებობდა. ახლა არის შანსი, რომ ეს ოცნება სწრაფად განხორციელდეს", - აღნიშნა კირიენკომ.

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

საქართველოს სამოქალაქო საავიაციო სააგენტო მაშინ განცხადებით გამოეხმაურა ოკუპირებული აფხაზეთის მთავრობის გადაწყვეტილებას სოხუმის აეროპორტის აღდგენის შესახებ. გავრცელებულ განცხადებაში აღნიშნულია, რომ საქართველოს ნებართვის გარეშე, სოხუმის აეროპორტში საერთაშორისო საჰაერო მიმოსვლა ვერ განხორციელდება.

ცნობისთვის, 2006 წელს სამოქალაქო ავიაციის საერთაშორისო ორგანიზაცია ICAO - მ გააუქმა სოხუმის აეროპორტის კოდი და დოკუმენტებიდან ამოიღო ინფორმაცია ამის შესახებ.