Facebook-ი, Twitter-ი და სხვა სოციალური ქსელი ოჯახებისთვის სერიოზულ საფრთხედ იქცა. ამის შესახებ The Daily Mail-ი ახალ კვლევებზე დაყრდნობით წერს. იურისტების თქმით, სოციალური ქსელი განქორწინებების მიზეზი სულ უფრო მეტად ხდება.

გაირკვა, რომ ათიდან შვიდი დაქორწინებული რესპოდენტი Facebook-სა და სხვა სოციალურ ქსელში გამოქვეყნებული ქმრის ან ცოლის პოსტების გამო სერიოზულად ფიქრობს განქორწინებაზე. ამავე რაოდენობის გამოკითხულმა აღიარა, რომ სოციალურ ქსელში პარტნიორის ღალატის მტკიცებულებებს ეძებს. ყოველმა მეხუთე რესპოდენტმა განაცხადა, რომ თავის მეორე ნახევართან ყოველდღიურად ჩხუბობს სოციალურ ქსელში მისი აქტიური ჩართულობის გამო. განსაკუთრებით ეჭვიანობს პარტნიორის მხრიდან საპირისპირო სქესთან მიმოწერის გამო, რა თემასაც არ უნდა ეხებოდეს ის.

კვლევა ტრანსნაციონალურმა იურიდიულმა ფირმამ Slater and Gordon-მა ჩაატარა. ამ კომპანიის კლიენტების უმეტესობა აცხადებს, რომ Facebook-მა, Skype-მა, Snapchat-მა, Twitter-მა, What'sApp-მა და სხვა სოციალურმა ქსელმა მათ განქორწინებაში მთავარი როლი შეასრულა. „ხუთი წლის წინ Facebook-ი იშვიათად მოიხსენიებოდა ქორწინებების დანგრევის კონტექსტში, მაგრამ ახლა ეს ჩვეულებრივი მოვლენაა. სოციალური ქსელები ქორწინებებისთვის ახალ დანაღმულ ველად იქცა“, - განაცხადა Slater and Gordon-ის იურისტმა ენდრიუ ნიუბერმა.