ქალაქ ზუგდიდის მერია აუქციონის წესით ოთხი ობიექტის გაყიდვას გეგმავს. მათ შორისაა, საგანგებო სიტუაციების მართვის სამსახურის (სახანძრო) შენობა, რომელიც ქალაქის ცენტრალურ ნაწილში, კედიას ქუჩაზე მდებარეობს.  ეკონომიკის, ურბანული განვითარებისა და ქონების მართვის საკითხთა კომისიის თავმჯდომარის თენგიზ ქოჩუას თქმით, მიწის ნაკვეთი, სადაც ამჟამად სახანძრო შენობა დგას,  1061 კვ.მ-ია. აუქციონზე მიწის ნაკვეთის  საწყისი ფასი 360 ათასი ლარი იქნება. აღნიშნული მიწის ნაკვეთი სხვადასხვა პირობებით იყიდება. მათ შორის, უნდა აშენდეს საერთაშორისო ბრენდის მქონე სავაჭრო ობიექტი, დასაქმდეს მინიმუმ 70 ადამიანი, განხორციელდეს არანაკლებ 1, 5 მილიონი ამერიკული დოლარის ინვესტიცია და სხვა. საკრებულოს წევრმა „ნაციონალური მოძრაობიდან“ ბათლომე შელიამ საკრებულოს სხდომაზე  განაცხადა, რომ  აღნიშნული მიწის გაყიდვის პირობები მასში ეჭვებს ბადებს და აქედან გამომდინარე მისი ფრაქცია ამ საკითხს მხარს არ დაუჭერს. მისივე თქმით, ეს კომპანია შესაძლებელია იყოს სწრაფი კვების ობიექტი „ვენდი“. „ჩვენ მივესალმებით ყველა კომპანიის შემოსვლას, თუმცა, ჩვენ შენიშვნები გვაქვს პირობებთან. დაუშვათ, რომელიმე კომპანიამ შემოგვთავაზა მილიონ ლარზე მეტი, მაგრამ ვერ ასაქმებს 70 კაცს და ასაქმებს 50 ადამიანს, ამ შემთხვევაში რას ვაკეთბთ? ამაზე პასუხი ვერ მივიღე“, - თქვა ბათლომე შელიამ. გარდა ამისა, ქალაქის მერია სასტუმრო„ ოდიშის“ შენობის ნაწილის, მეორე და მესამე სართულის  გაყიდვას გეგმავს. მეორე სართულზე მდებარე ფართი 320 კვ.მ-ია და მისი საწყისი ღირებულება 147 ათასი ლარია, ხოლო მესამე სართულის საწყისი ფასი 123 ათასი ლარია და მისი საერთო ფართი მეორე სართულის ტოლია. ამ შემთხვევაში, მყიდველს ნასყიდობის ხელშეკრულებიდან 6 თვეში მხოლოდ გარე ფასადის მოწესრიგება მოუწევს. რაც შეეხება თამარ მეფის ქუჩაზე მდებარე 700 კვ. მ მიწის ნაკვეთის საწყისს ღირებულებას, ის 96 ათასი ლარს შეადგენს და აუქციონი უპირობოა. ზემოაღნიშნული ობიექტების გაყიდვას, გარდა „ნაციონალური მოძრაობის“ წევრისა, ყველა დეპუტატმა დაუჭირა მხარი.