ქალაქ ზუგდიდის საკრებულოს წევრებმა საზოგადოებრივი ორგანიზაციის წარმომადგენლებთან ერთად ,,საკრებულოს წევრის ეთიკის კოდექსი“ განიხილეს. კოდექსის საჯარო განხილვა საერთაშორისო ორგანიზაცია NDI-ს ორგანიზებით, ზუგდიდის დემოკრატიული ცენტრის ოფისში გაიმართა. არასამთავრობო ორგანიზაციის წარმომადგნელებს ეთიკის კოდექსთან დაკავშირებით, საკუთარი მოსაზრებები, შენიშვნები და რეკომენდაციები აქვთ. განსაკუთრებული კამათი გამოიწვია კოდექსის მესამე მუხლმა, სადაც საკრებულოს წევრებს შორის ურთიერთ უპატივცემლობასა და შეურაცხყოფაზეა საუბარი. “სამართლებრივი დაცვის ინსტიტუტის” იურისტის რუსუდან პაჭკორიას თქმით, კოდექსის მესამე მუხლში ტერმინები - უპატივცემლობა და შეურაცხყოფა განმარტებული უნდა იყოს და პუნქტებად ჩამოყალიბდეს. აღნიშნულ მოსაზრებას ეთანხმება ქალაქის საკრებულოს წევრი „ნაციონალური მოძრაობიდან“ ანა წითლიძე. მისი თქმით, თუ ტერმინები - უპატივცემლობა და შეურაცხყოფა არ იქნება განმარტებული, ეს მომავალში პრობლემებს შექმნის, რადგან ეს ტერმინები ყოველთვის სადაო იქნება. „ჩვენ გვქონდა არაერთი რეკომენდაცია, რომელიც ამ დოკუმენტში გათვალისწინებული იქნა და გვაქვს რეკომენდაციები, რომელიც ჯერ არ არის გაზიარებული. ეს კონკრეტულად მესამე თავს ეხება, სადაც ბოლომდე არ არის ჩაშლილი თუ რა შეიძლება ჩაითვალოს უპატივცემლობად და შეურაცხყოფად“, - თქვა ანა წითლიძემ. ეთიკის კოდექსის პროექტის ერთ-ერთი ავტორის და საკრებულოს წევრის ნუგზარ სარიას თქმით, საზოგადოებრივ ორგანიზაციებთან ერთად ეთიკის კოდექსის ბოლო განხილვა შედგა და მათ რეკომენდაციებს მაქსიმალურად გაითვალისწინებენ. „შეურაცხყოფა და უპატივცემლობა, ეს ისეთი ტერმინებია, რომელთაც ამომწურავად ვერ განმარტავ. ძალიან ძნელია შეურაცხყოფის დეფინიცია გააკეთო დოკუმენტში და თქვა ეს არის მისი აბსოლუტური განმარტება. ჩვენ ამ კოდექსის შექმნისას ვიხელმძღვანელეთ ევროპული გამოცდილებით და იქაც იგივე ფორმითაა გადმოცემული, როგორც ჩვენთან. თუმცა მაქსიმალურად შევეცდებით ყველა რეკომენდაცია შეძლებისდაგვარად გავითვალისწინოთ.“,- თქვა ნუგზარ სარიამ. ეთიკის კოდექსის პროექტზე ქალაქ ზუგდიდის საკრებულოს ფრაქციამ „ ზუგდიდის მომავლისთვის“ იმუშავა. კოდექსის საბოლოოდ დამტკიცების შემთხვევაში, საქართველოში ზუგდიდი იქნება პირველი ქალაქი, რომლის საკრებულოსაც ეთიკის საკუთარი კოდექსი ექნება. გთავაზობთ რამდენიმე მუხლს ამავე კოდექსის პროექტიდან: 1. საკრებულოს წევრებმა თავის საქმიანობაში არ უნდა დაუშვან ნეპოტიზმი და ნებისმიერ შემთხვევაში უნდა აღკვეთონ ეს უარყოფითი მოვლენა. 2. საკრებულოს წევრებმა აქტიურად უნდა ითანამშრომლონ მასობრივი ინფორმაციის საშუალებების წარმომადგენლებთან საზოგადოებისთვის აქტუალურ საკითხებთან დაკავშირებით. 3. საკრებულოს წევრებმა კრიტიკის მიმართ ტოლერანტული და კორექტული დამოკიდებულება უნდა გამოავლინონ. კოდექსის პროექტის თანახმად, ეთიკის კოდექსის დარღვევის გამო საკრებულოს წევრს წესრიგისკენ მხოლოდ საკრებულოს თავმჯდომარემ შეიძლება მოუწოდოს. კოდექსის დამრღვევს შემდეგი პასუხისმგებლობა ეკისრება: წესრიგისკენ მოწოდება. გაფრთხილება გაფრთხილება ოქმში შეტანით სიტყვით გამოსვლის უფლების ჩამორთმევა შესაბამის საკითხზე გადაწყვეტილების მიღებამდე. ემოციურად გამოხატავს თავის კმაყოფილებას ან უკმაყოფილებას სხდომის მიმდინარეობასთან დაკავშირებით, რითაც ხელს უშლის სხდომის მიმდინარეობას და სხვა. სხდომაზე მომხდარ ინციდენტს შესაბამისი კომისია განიხილავს. საბოლოოდ, კოდექსის დამრღვევის ვინაობა გასაჯაროვდება. “მოხდება საკრებულოს ყველა იმ წევრის ვინაობის გასაჯაროება ყველა კონკრეტულ შემთხვევაში, როდესაც ადგილი ექნება მათი მხრიდან არაეთიკური და არაპროფესიული საქციელის ჩადენას”, – წერია კოდექსის პროექტში.