ქალაქის დასუფთავებაში არსებულ პრობლემებზე ისაუბრეს ქალაქ ზუგდიდის მუნიციპალიტეტის საკრებულოს დღევანდელ სხდომაზე. საკრებულოს წევრის „ნაციონალური მოძრაობიდან“ ანა წითლიძის თქმით, ქალაქში განთავსებული ურნების რაოდენობა და  კვირაში ერთხელ „ზუგდიდდასუფთავების“ მაქანების მომსახურება, არ არის საკმარისი, რაც ხშირ შემთხვევაში ანტისანიტარიის მიზეზი ხდება. „ქალაქში თუ საკმარისი ბუნკერები არ არის, ისე მაინც უნდა გავაკეთოთ, რომ  დასუფთავების მანქანები ქუჩებში უფრო ხშირად შევიდეს და არა კვირაში ერთხელ“, - თქვა ანა წითლიძემ. ქალაქ ზუგდიდის მერიის აიპ „ზუგდიდასუფთავების“ სამსახურის უფროსი ნუგზარ მოლაშხია ნაგვის ბუნკერების ნაკლებობას ადასტურებს და მწირ ბიუჯეტზე საუბრობს. მისივე ინფორმაციით, მერიამ ცენტრალურ მთავრობას ურნების მოთხოვნით უკვე მიმართა და პასუხს უახლოეს მომავალში ელოდებიან. „ჩემზე მეტად არავის სურს, რომ ქალაქი იდეალურად იყოს დასუფთავებული. მეტსაც გეტყვით, მინდა, რომ ნაგვის მანქანები მიწისქვეშ მოძრაობდნენ. ქალაქში 430-ზე მეტი ქუჩა გვაქვს და ყველგან 2-2  რომ დავდგათ, 1000- მდე გვჭირდება. რაც გვაქვს ის მოძველებულია.თითო ბუნკერის ღირებულება მინიმუმ 700 ლარია. აქედან გამომდინარე, საკმარისი რაოდენობის ურნების შესაძენად,  1 მილიონი ლარი დაგვჭირდება. რაც შეეხება კვირაში ერთხელ მანქანის ქუჩებში შესვლას, ესეც უდიდესი შრომის შედეგია“, - თქვა ნუგზარ მოლაშხიამ. ცნობისთვის, ქალაქ ზუგდიდის აიპი „ზუგდიდასუფთავების 2015 წლის ბიუჯეტი 1300 მილიონ ლარს შეადგენს.