ზუგდიდის მუნიციპალიტეტის გამგეობის, მძიმე საცხოვრებელი პირობების მქონე პირთა საცხოვრებელი ფართით უზრუნველყოფის კომისიამ მორიგი სხდომა გამართა. სხდომაზე ზუგდიდის გამგებელმა და ამავე კომისიის თავმჯდომარე ედიშერ თოლორაიამ თქვა, რომ მომდევნო წლის ბიუჯეტში მძიმე საცხოვრებელი პირობების მქონე ოჯახებისთვის სახლის მშენებლობის მუხლის დაფინანსება გასამმაგდება და 1 მილიონ ლარს გადააჭარბებს. სამუშაო შეხვედრაზე ოთხ ჯგუფად დაყოფილმა კომისიის წევრებმა იმ ოჯახების ფოტოები წარადგინეს, რომელთა მდგომარეობას ისინი ადგილზე გაეცნენ. კომისიამ სულ 184 ოჯახის მდგომარეობა შეისწავლა, თუმცა თითო ჯგუფმა ყველაზე მძიმე საცხოვრებელი პირობების მქონე 7-9 ბენეფიცარი ოჯახის შესახებ იმსჯელა.  საბოლოო გადაწყვეტილებას კომისია, სავარაუდოდ, მომდევნო სხდომაზე მიიღებს. „საერთო სურათი ძალიან მძიმეა, თუმცა წელს პრიორიტეტი მიენიჭება იმ ოჯახებს, რომლებსაც ყველაზე მძიმე საცხოვრებელი პირობები გააჩნიათ და სადაც მცირეწლოვანი ბავშვები, შშმ პირები და ონკოლოგიური ავადმყოფები ცხოვრობენ“, - თქვა გამგებლის მოადგილემ და კომისიის წევრმა გურგენ სართანიამ. გერმანული საზოგადოებრივი ორგანიზაციის „მუშა სამარიტელთა კავშირი“ (ASB) წარმომადგენელი ია ესებუა, რომელიც ზემოაღნიშნულ კომისიაში არასამთავრობო ორგანიზაციებს წარმოადგენს, ამბობს, რომ ოჯახების შერჩევა განსაკუთრებულ მიდგომას საჭიროებს. „იმ ოჯახებს, რომლებიც პასუხის მოლოდინში არიან უსამართლობის განცდა არ უნდა დარჩეთ და აქედან გამომდინარე, ის კრიტერიუმები, რომლის მიხედვითაც მოხდება ბენეფიციარების შერჩევა მკაცრად უნდა იყოს განსაზღვრული“, - თქვა ია ესებუამ. ზუგდიდის მუნიციპალიტეტის გამგეობა უკიდურესად შეჭირვებულ ოჯახებს, რომელთა საცხოვრებელი სახლები ამორტიზირებულია და რემონტს არ ექვემდებარება, 35კვ/მ-მდე საცხოვრებელ სახლებს საკუთარ კარ-მიდამოში აუშენებს. პროგრამის განხორციელებისთვის ადგილობრივ ბიუჯეტში 350 ათასი ლარია გათვალისწინებული. წელს, დაახლოებით, 20 ასეთი სახლის მშენებლობა იგეგმება. აღნიშნული პროგრამა სოციალურად დაუცველი ოჯახებისთვის ე.წ. ერთჯერადი 100 ლარიანი დახმარების გაცემის ნაცვლად ხორციელდება.