საქართველო სირიიდან და ერაყიდან შემოსულ, თავშესაფრის მაძიებელთა 95%-ს ლტოლვილის ან ჰუმანიტარულ სტატუსს ანიჭებს. განსახლებისა და ლტოლვილთა სამინისტროს რეპატრიაციისა და ლტოლვილთა საკითხების დეპარტამენტის უფროსის ირაკლი კოკაიამ განაცხადა, 2012 წლიდან დღემდე, საქართველოს თავშესაფრის თხოვნით ერაყიდან ლტოლვილმა 2 114-მა პირმა მიმართა, თუმცა აქედან ნაწილი განმეორებითი მიმართვაა. ლტოლვილის სტატუსი 77-ს მიენიჭა, ჰუმანიტარული _ 217-ს. ამჟამად თავშესაფრის მაძიებლად რეგისტრირებულია 355 პირი, 333-მა სტატუსის მინიჭებაზე უარი მიიღო. ამასთან, 1 474 შემთხვევაში განმცხადებლებმა ქვეყანა განცხადების განხილვის პერიოდში დატოვეს. რაც შეეხება სირიას, აღნიშნულ პერიოდში საქართველოს სირიის 167-მა მოქალაქემ მიმართა. აქედან ლტოლვილის სტატუსი _ 5-ს, ჰუმანიტარული კი 62 პირს მიენიჭა. დღესდღეობით განხილვაშია 31 საქმე, 51 საქმე შეწყდა იმის გამო, რომ განმცხადებელმა ქვეყანა დატოვა, ხოლო 18 პირს სტატუსზე უარი ეთქვა. ირაკლი კოკაიას ინფორმაციით, სტატუსის მინიჭებაზე უარის თქმის შემთხვევები ძირითადად ერაყიდან და სირიიდან ლტოლვილთა ნაკადის შემოსვლის თავდაპირველ ეტაპზე ფიქსირდებოდა, ისიც იმიტომ, იმ დროისთვის ამ ადამიანებს ჯერ კიდევ ჰქონდათ შიდა გადაადგილების ალტერნატივა. "საწყის ეტაპზე, როდესაც 2012 წელს დაიწყო შემოდინება, უარის მიზეზი ის იყო, რომ საომარი მოქმედებები ერაყის მთელ ტერიტორიაზე არ მიმდინარეობდა. ადამიანს, რომელიც ჩამოდიოდა და ითხოვდა თავშესაფარს, ჰქონდა შიდა გადაადგილების საშუალება. უკრიანის მაგალითი რომ ავიღოთ, დონბასში არის ომი, მაგრამ კიევში არ არის. ასევე ერაყში, მათ შეეძლოთ გადაადგილებულიყვნენ ქვეყნის შიგნითვე, იქ, სადაც აბსოლუტური სიმშვიდე იყო. შიდა გაადგილების ალტერნატივის ქონა იყო ძირითადი უარის თქმის მიზეზი, შემდგომ კი ვითარება გართულდა და ISIS-ის არმიამ თითქმის მთელი ერაყის ტერიტორია მოიცვა, ქურთისტანის გამოკლებით, მაგრამ იქ ჰუმანიტარული კატასტროფა დადგა. შესაბამისად, შიდა გადაადგილების ალტერნატივის ქონის მიზეზით დღეს უარს ვერ ვეუბნებით და ფაქტობრივად, 95% შემთხვევაში ვანიჭებთ სტატუსს, რაც ძალიან მაღალი მაჩვენებელია", - განაცხადა ირაკლი კოკაიამ. მისივე თქმით, სტატუსის მინიჭებაზე უარის თქმის მიზეზი, როგორც წესი, ქვეყნის უსაფრთხოებიდან გამომდინარეობს. "თუ ადამაინი არაფორმალურ სამხედრო შენაერთებში იბრძოდა, შემჩნეულია წამებაში და ა.შ., ასეთ ადამიანებისთვის თავშესაფრის გამოყოფა და სტატუსის მინიჭება არ ხდება. მათ, ვინც სტატუსის მინიჭებაზე უარს მიიღეს, ხოლო საქართველოში მათი ყოფნის სხვა სამართლებრივი საფუძველი არ არსებობს, ქვეყანა უნდა დატოვონ", - დასძინა კოკაიამ.