21-22 მაისს რიგაში აღმოსავლეთ პარტნიორობის რიგით მეოთხე სამიტი გაიმართება. სამიტში ევროკავშირის 28 წევრი სახელმწიფოსა და აღმოსავლეთ პარტნიორობის მონაწილე 6 ქვეყნის (საქართველო, მოლდოვა, უკრაინა, აზერბაიჯანი, სომხეთი და ბელორუსი) წარმომადგენლები მიიღებენ მონაწილეობას. სამიტს უხელმძღვანელებს ევროპული საბჭოს პრეზიდენტი დონალდ ტუსკი, რომელიც ევროკომისიის პრეზიდენტ ჟან-კლოდ იუნკერთან ერთად, ევროკავშირს წარმოადგენს, მასპინძელი კი ლატვიის პრემიერ-მინისტრი ლაიმდოტა სტრაუიუმა იქნება. სამიტს ასევე დაესწრებიან ევროკავშირის უმაღლესი წარმომადგენელი საგარეო ურთიერთობებისა და უსაფრთხოების პოლიტიკის საკითხებში ფედერიკა მოგერინი, ევროკომისარი სამეზობლო პოლიტიკისა და გაფართოების საკითხებში იოჰანეს ჰანი, ევროკომისარი ვაჭრობის საკითხებში სესილია მალმსტრომი. სამიტის პლენარული სესია 22 მაისს გაიმართება,რომლის ბოლოს მონაწილეები ერთობლივ დეკლარაციას მიიღებენ. აღმოსავლეთ პარტნიორობის (EAP) წინადადება, როგორც ევროკავშირის აღმოსავლეთ მეზობელ ქვეყნებთან თანამშრომლობის ახალი ფორმატი, თავდაპირველად შვედეთისა და პოლონეთის მიერ იყო ინიცირებული. აღმოსავლეთ პარტნიორობის სამიტი ორ წელიწადში ერთხელ იმართება და მის მიზანს პოლიტიკური გადაწყვეტილებების მიღება წარმოადგენს. პირველი სამიტი - 2009 წლის 7 მაისს, პრაღაში, მეორე 2011 წლის 29-30 სექტემბერს - ვარშავაში, მესამე სამიტი კი 2013 წლის 28-29 ნოემბერს, ვილნიუსში გაიმართა.