კალიფორნიის შტატის სამხრეთით ნავთობის დაღვრის გამო საგანგებო მდგომარეობაა გამოცხადებული. "ბიბისის" ცნობით, ინციდენტის მიზეზი ქალაქ სანტა-ბარბარას ტერიტორიაზე ნავთობსადენის დაზიანება გახდა, რამაც 15 კილომეტრიანი სანაპირო ზოლის დაბინძურება გამოიწვია. ადგილობრივი ხელისუფლების ცნობით, დაახლოებით 400 ათასი ლიტრი ნავთობი დაიღვარა. ნავთობკომპანია Plains All American Pipeline-ის წარმომადგენელი დარენ პალმერი აცხადებს,რომ ნავთობი საათში 84 000 გალონის სისწრაფით მიედინებოდა, როდესაც მილსადენი დაზიანდა. აღნიშნული ნავთობსადენი 1991 წელს აშენდა და მას შემოწმება რამდენიმე კვირის წინ ჩაუტარდა. პალმერის განცხადებით, მომხდარზე პასუხისმგებლობას კომპანია იღებს და გაწმენდითი სამუშაოებისათვის საჭირო ყველა ხარჯს გაიღებს. ინცინდენტი აღმოფხვრილია და სანაპიროზე გაწმენდითი სამუშაოები უკვე მიმდინარეობს : ნავთობის მნიშვნელოვანი ნაწილი სანაპიროს ქვიშასა და ქვებში ჩავიდა, თუმცა 21 ათასი გალონი (80 ათასი ლიტრი)ოკეანეში ჩაიღვარა. კალიფორნიის გუბერნატორმა ჯერი ბრაუნმა საგანგებო მდგომარეობის შემოღების შესახებ განაცხადა, რათა შტატმა „ სწრაფად შეძლოს ყველა საჭირო რესურსის მობილიზება.“ ეკოლოგები ცოცხალი ბუნებისთვის, განსაკუთრებით,სანაპიროს მიმდებარე ფაუნისთვის მიყენებული ზარალის გამო შეშფოთებას გამოთქვამენ, რადგან, მათი თქმით, დიდი რაოდენობით ნავთობის დაღვრა ველურ ბუნებას, ფრინველებსა და ვეშაპებს შეუქმნის საფრთხეს.