ზუგდიდის რაიონულ სასამართლოში საპროტესტო შინაარსის სტენსილების ავტორისა და სამოქალაქო აქტივისტის როსტომ ზარანდიას სასამართლო პროცესი გაიმართა. მას პოლიცია ადმინისტრაციულ სამართალდარღვევათა კოდექსის 150-ე მუხლის მე-2 ნაწილის დარღვევას ედავებოდა, რაც მუნიციპალიტეტის ტერიტორიის იერსახის დამახინჯებას გულისხმობს.

კერძოდ, მოსამართლე ფატი ფურცხვანიძემ, ზუგდიდის რაიონული პროკურატურის შენობაზე "ნეტგაზეთისა“ და „ბათუმელების“ თანადამფუძნებლის მზია ამაღლობელის სტენსილის მიხატვის გამო, აქტივისტი 2000 ლარის ოდენობით დააჯარიმა.

ამასთან, პროცესის მიმდინარეობისას საპროტესტო შეძახილისთვის, სასამართლომ ზარანდიას 300 ლარის ოდენობის ჯარიმაც დააკისრა და სასამართლოს უპატივცემულობის არგუმენტით სხდომის დარბაზიდან გააძევა.

„ფურცხვანიძეს მივაწოდე მასალა, სადაც ჩემს მიერ დახატული ნახატებია მერიის შენობის კედელზე, თეატრის კედელზე და სხვადასხვა ადგილებში, რომელთა გამო არ დავუჯარიმებივართ. იქ ნებართვის გარეშე გავაკეთე ნახატები. იმ ადგილას, სადაც მედავებიან, გვერდზე ადრე სტალინიც დავხატე. ამაზე რეაქცია არ ჰქონიათ. ამ დროს, გარედან ხმაური შემოესმა მოსამართლეს და მოგვიწოდა, სასამართლოს პატივი ეცითო. მე ვუთხარი, თქვენ მოსამართლე რომ იყოთ, დავდგებოდი მუხლების ჩოქვით და პატივისცემასაც დაიმსახურებდით მეთქი. ამის გამო დამაჯარიმა 300 ლარით და გამაძევა. ამ პროცესისთვის ძალიან მობილიზებულები იყვნენ, სხდომა დაიწყეს ადრე, მე გამომაგდეს, არც დანარჩენები არ შეიყვანეს და ხალხის გარეშე ჩატარდა პროცესი.

მერიის კედელზეა ჩემი ნახატები გამოსახული. ამ დროს კი მედავებიან, რომ უწყების კედელზე დავხატე და იერსახე შევუცვალე ქალაქს. მათ პრობლემა აქვთ სტენსილის შინაარსზე და არა იერსახის დამახინჯებაზე. ისინი სიტყვა თავისუფლებას ვერ იტანენ. თავისუფლება მზია ამაღლობელს და რეჟიმის ყველა პატიმარს“, - ამბობს ზარანდია რადიო „ათინათთან“.

მისი თქმით, ის ჯარიმას არ გადაიხდის, გადაწყვეტილებას კი, სისტემისადმი ნდობის არარსებობის მიუხედავად, სასამართლოს ზემდგომ ინსტანციაში გაასაჩივრებს.

ცნობისთვის, სამოქალაქო აქტივისტს პოლიციამ სამართალდარღვევის ოქმი სახლში 18 თებერვალს მიუტანა.

შეგახსენებთ, ქართული ოცნების" საკანონმდებლო ცვლილებების მიხედვით, „სხვადასხვა სახის წარწერების, ნახატების, სიმბოლოების თვითნებურად შესრულება ადმინისტრაციული ორგანოების შენობათა ფასადებზე, აგრეთვე მათ მიმდებარე ტერიტორიაზე, მათ შორის, ფეხით მოსიარულეთა და სატრანსპორტო საშუალებების სავალ ნაწილზე“ ითვალისწინებს 2 000 ლარის ოდენობით დაჯარიმებას.


ამავე თემაზე: 

ზუგდიდში საპროტესტო შინაარსის სტენსილების ავტორს პოლიცია ქალაქის იერსახის დამახინჯებას ედავება