მორიგი ტურისტული სეზონის წინ ე.წ. აფხაზურ-რუსული საზღვარი ფსოუს საკონტროლო - გამშვებ პუნქტზე საშტატო რეჟიმში მუშაობს, წერს „სპუტნიკ აბხაზია“. რაულ ხაჯიმბამ 16 მაისს ჟურნალისტებთან შეხვედრაზე სოჭში პუტინთან გამართული მოლაპარაკებები შეაჯამა და აღნიშნა, სხვა საკითხებთან ერთად, რუსეთის პრეზიდენტთან საბაჟო და სასაზღვრო კონტროლიორების რაოდენობის გაზრდის აუცილებლობა და გამტარიანობის ზრდა განიხილებოდა. „ასევე განვიხილეთ მატარებლის ამოქმედების საკითხიც,რაც საგრძნობლად განტვირთავს „ფსოუს“ საკონტროლო - გამშვებ პუნქტს“, — თქვა ხაჯიმბამ. მან ჟურნალისტებს განუმარტა, რომ პუტინთან შეხვედრა, სწორედ „აფხაზური სახელმწიფოსთვის მნიშვნელოვანი საკითხების გადასაწყვეტად გაიმართა, რომელთა შორის ერთ-ერთია - აფხაზურ-რუსული საზღვრის გადაკვეთის რეჟიმის შემსუბუქება, „ფსოუს“ საკონტროლო - გამშვებ პუქტზე გამტარიანობის ზრდა,საფეხმავლო და ავტოსატრანსპორტო ნაწილების განცალკევების გზით.