გალის რაიონის ე.წ. ადმინისტრაციის ხელმძღვანელმა თემურ ნადარაიამ სოფლების პირველი და მეორე ოტობაია მცხოვრებლებს სასოფლო-სამეურნეო მიწის გადასახადისა და იჯარის გაანგარიშება გააცნო. შეხვედრა 8 ივლისს შედგა.

ნადარაიას თქმით, გალის რაიონში სასოფლო - სამეურნეო მიწების ინვენტარიზაცია დაიწყო. მან აღნიშნა, რომ სოფელ ფიჩორში, მეორე ოტობაიაში სოფლის ადმინისტრაციის ე.წ. ხელმძღვანელის მონაცემებით, ე.წ. მიწის კომისიამ გამოავლინა, რომ სრულშემოსავლიანი თხილის პლანტაციები – 320 ჰექტარზე, ხოლო თხილის ახალგაზრდა ნარგავები — 100 ჰექტარზეა გაშენებული.

ნადარაიამ ასევე განაცხადა, რომ მან თანამდებობიდან გაათავისუფლა სოფლის ადმინისტრაციის ხელმძღვანელი ზურაბ ქიშმარია, რაც, მისი თქმით, სასოფლო - სამეურნეო მიწების ინვენტარიზაციის შედეგებთან არის დაკავშირებული. ნადარაიამ თქვა, რომ სოფლის მცხოვრებლებს საშუალება აქვთ მიწის კომისიის მუშაობის დაწყებიდან პირველი სამი დღის განმავლობაში განაცხადონ მათ მიერ უკანონოდ დაკავებული ტერიტორიების შესახებ , მხოლოდ ამ შემთხვევაში შეძლებენ ისინი საჯარიმო სანქციების თავიდან აცილებას და გასული წლის მიწის გადასახადისგან გათავისუფლებასაც კი.

ე.წ. საგადასახადო ინსპექციის მუშაობის შედეგების მიხედვით, სოფელ ფიჩორის მცხოვრებლებს ,რომლებმაც თავისი გაუფორმებელი მიწების შესახებ არ განაცხადეს, 80 - დან 200 - მდე ათასი რუბლის ოდენობით ჯარიმა დაეკისრათ. შეხვედრაზე, სოფლის მცხოვრებლებს დაწვრილებით აუხსნეს, თუ რა ტიპის მიწის გადასახადები ეკისრებათ, რა შეიცვალა ე.წ. საგადასახადო და საიჯარო სისტემაში.

0,5 ჰექტარამდე მიწის ნაკვეთზე გადასახადი - 370 რუბლს შეადგენს, სრულმოსავლიანი თხილით განაშენიანებული 1 ჰა მიწაზე გადასახადი – 2250 რუბლს, ხოლო თხილის ახალი ნარგავებით განასენიანებული 1 ჰა მიწის ნაკვეთზე გადასახადი – 1125 რუბლს შეადგენს, ერთწლიანი კულტურებით განაშენიანებული 1 ჰა მიწაზეგადასახადი - 750 რუბლია. ასეთივეა მიწის იჯარის საფასური. მიწის გადასახადისა და იჯარის საფასური გალის რაიონის მცხოვრებლებმა 2015 წლის 15 ოქტომბრამდე უნდა გადაიხადონ.