ზუგდიდის მერიის ყოფილი მაღალჩინოსნის თენგიზ ქობალიას ადვოკატის სოსო ჯანაშიას ინფორმაციით, ქობალიას გათავისუფლების მოთხოვნით ამ დრომდე, თითქმის, 6 ათასი ხელმოწერაა შეგროვებული. როგორც ჯანაშიამ რადიო „ათინათს“ უთხრა, აღნიშნულ ხელმოწერებს შუამდგომლობის სახით სასამართლოს მომდევნო სხდომაზე, 4 თებერვალს წარუდგენს.

„ახლაც არის მოთხოვნა და გამოხმაურება საზოგადოების მხრიდან, რომ ხელი მოაწერონ აღკვეთის ღონისძიების შეცვლას, თუმცა, ალბათ, 6 ათასი ხელმოწერა საკმარისი იქნება. ამასთან, ამ ცალკე გვექნება პარლამენტის წევრების ხელმოწერებიც. ძალიან მასშტაბური პროცესი გამოვიდა, რადგან საზოგადოების უმეტესი ნაწილი ერთსულოვანი აღმოჩნდა, მათ შორის, საჯარო მოხელეებიც, საზოგადოება „ზუგდიდელის“ წევრები, თენგოს მეგობრები და სხვა მოქალაქეებიც არიან. ამასთან, მოსამართლემ წინასწარი პატიმრობის შეფარდების მოტივად საზოგადოების მაღალი ინტერესი დაასახელა და ეს ხელმოწერები ცხადყოფს, რომ პატიმრობა საჯარო მოთხოვნა სულაც არ არის“, - გვითხრა ჯანაშიამ.



ზუგდიდის მერიის მუნიციპალური სერვისების მართვის სამსახურის ყოფილი უფროსის თენგიზ ქობალიას მიმართ სოლიდარობის გამოსახატად სოციალურ ქსელში მისმა მეგობარმა ლევან ბეჭვაიამ პოსტი გამოაქვეყნა, რომელშიც მან ქობალიას სოლიდარობა გამოუცხადა და ამისკენ საზოგადოებასაც მოუწოდა. სწორედ ამის შემდეგ დაიწყო ბეჭვაიას ინიციატივით ხელმოწერების შეგროვება. ქობალიას მხარდამჭერები მიიჩნევენ, რომ ბრალდების გათვალისწინებით ის წინასწარ პატიმრობაში არ უნდა იყოს.

თენგიზ ქობალია, რომელიც ბრალს არ აღიარებს, 24 დეკემბერს საკუთარ კაბინეტში დააკავეს. გამოძიება მას დანაშაულის შეუტყობინებლობას ედავება. სუს-ის განცხადებაში აღნიშნულია, რომ იგი ზუგდიდის მუნიციპალიტეტის მერის ლაშა გოგიას და ვიცე-მერის გია გულორდავას მიერ განსაკუთრებით მძიმე დანაშაულის ჩადენის ფაქტი შეიტყო და აღნიშნულის შესახებ სამართალდამცავ ორგანოებს არ აცნობა. ქობალიას წინასწარი პატიმრობა 25 დეკემბერს შეეფარდა.


ამავე თემაზე:

გათავისუფლების მოთხოვნით თენგიზ ქობალიას მეგობრები თავდებში უდგებიან