დემოკრატიის კვლევის ინსტიტუტის თანახმად, რუსული პროპაგანდის გავლენა იზრდება ოკუპირებული აფხაზეთის დე ფაქტო ხელისუფლების მიერ მართულ მედიაში, თუმცა, როგორც ორგანიზაცია წერს, აფხაზური საზოგადოება ამ მესიჯებს სრულად არ იზიარებს.
„უფრო მეტიც, აფხაზები შიშობენ, რომ იმ შემთხვევაში, თუ საქართველო თავისი განვითარების დასავლურ კურსზე იტყვის უარს, აფხაზეთი შესაძლოა საქართველოს და ოკუპანტი რუსეთის ხელისუფლებებმა გაიყონ“, - ვკითხულობთ ინფორმაციაში. 

ამავე ცნობით, პარალელურად, გალის რეგიონში რუსული პროპაგანდა აქტიურობს.

“გალის რეგიონში მოქმედ ჰუმანიტარულ კოლეჯს, რომელიც უშუალოდ რუსეთის ფედერაციის განათლების სამინისტროს ზედამხედველობის ქვეშ ფუნქციონირებს, კრასნოდარის მხარის ქალაქ არმავირის სახელმწიფო უნივერსიტეტის დელეგაცია და აფხაზეთის დე ფაქტო განათლების მინისტრი ინალ გაბლია სტუმრობდნენ. მათ ადგილობრივ აუდიტორიას ამცნეს, რომ კოლეჯის წლევანდელ კურსდამთავრებულებს, სურვილის შემთხვევაში, არმავირის უნივერსიტეტში უფასოდ და უკონკურსოდ შეუძლიათ სწავლის გაგრძელება რუსული ენისა და ლიტერატურის სპეციალობის დასაუფლებლად, რისთვისაც უნივერსიტეტი მათ საცხოვრებლით და სტიპენდიით უზრუნველყოფს. რუსული „გულუხვი“ შეთავაზების მიუხედავად, ადგილობრივები ამ წინადადებას ენთუზიაზმით არ შეხვედრიან - შემოთავაზებით შესაძლოა მხოლოდ სამმა ადგილობრივმა ისარგებლოს”, - წერს დემოკრატიის კვლევის ინსტიტუტი.

მათივე ინფორმაციით, გალის რაიონის ე.წ. ადმინისტრაციის ხელმძღვანელი კონსტანტინე ფილია და დელეგაცია სტუმრობდნენ რუსეთის ფედერაციის ქალაქ იაროსლავლს, სადაც ადგილობრივ მერთან არტიომ მოლჩანოვთან შეხვედრის შემდეგ გაფორმდა თანამშრომლობის მემორანდუმი, რომელიც გალის რეგიონში რუსული ეკონომიკური პროექტების განხორციელებას ითვალისწინებს. იქვე გაფორმდა მსგავსი მემორანდუმი რუსეთის მიერ ოკუპირებული უკრაინული ზაპოროჟიეს ოლქის ადმინისტრაციასთანაც“.

DRI - ში მიიჩნევენ, რომ მსგავსი ხელშეკრულებები შიშს იწვევენ როგორც აფხაზებს, ისე ქართველებს შორის.

„ოკუპირებული აფხაზეთის ორივე ეთნიკური ჯგუფი შიშობს, რომ ასეთი შეთანხმებების შედეგად შემოსულ რუსულ ფულს რუსი მოსახლეობაც შემოჰყვება. უკვე არის პრეცედენტები, როდესაც ოჩამჩირესა და ტყვარჩელში რუსეთის მიერ ოკუპირებული დონეცკის და ლუგანსკის ოლქებიდან ჩამოსული ეთნიკური რუსები სოლიდურ თანხად ყიდულობენ სახლებსა და ციტრუსის მეურნეობებს. ადგილობრივების აზრით, რუსეთი მიზანმიმართულად და მეთოდურად ცდილობს აფხაზეთში დემოგრაფიული სურათის შეცვლას, აძლევს რა დაფინანსებას რუსულ ოჯახებს, რომ თუნდაც არაკეთილგანწყობილ აფხაზურ გარემოში, 1990-იან წლებში ეთნიკური ქართველების გამოდევნის შედეგად დაცლილ აფხაზეთის მიწებზე დასახლდნენ“, - ნათქვამია ინფორმაციაში.