ჟენევის საერთაშორისო მოლაპარაკებების 62-ე რაუნდზე ქართულმა დელეგაციამ რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობასა და ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლებში დაბრუნების თემებზე ისაუბრა. ამის შესახებ საქართველოს საგარეო საქმეთა სამინისტროს მიერ გავრცელებულ განცხადებაში ვკითხულობთ.

უწყების ცნობით, განიხილეს ოკუპირებულ რეგიონებში უსაფრთხოების, ჰუმანიტარული და ადამიანის უფლებების კუთხით შექმნილი მძიმე ვითარება და საოკუპაციო რეჟიმების დესტრუქციული ქმედებები.

სამინისტროში აღნიშნავენ, რომ საოკუპაციო რეჟიმის წარმომადგენლებმა, მოლაპარაკების უმთავრესი საკითხის განხილვის დაწყებისთანავე, რომელიც შეეხება ოკუპირებული ტერიტორიებიდან იძულებით გადაადგილებულ პირთა და ლტოლვილთა საკუთარ სახლებში დაბრუნებას, ტრადიციულად დატოვეს მოლაპარაკებების მაგიდა.

ცნობისთვის, აფხაზეთის დე ფაქტო რესპუბლიკის "საგარეო საქმეთა სამინისტროს" ინფორმაციით, მხარეებმა ვერ შეათანხმეს პოზიციები, აღნიშნული მექანიზმის ფარგლებში, შეხვედრების გამართვის ტექნიკურ პირობებთან დაკავშირებით, რაც აფერხებს მათი განზრახვის სისრულეში მოყვანას.

რუსეთის საგარეო უწყების მტკიცებით, საქართველოს მიერ ე.წ აფხაზეთისა და სამხრეთ ოსეთის ავტონომიური რესპუბლიკების მიმართ ძალის გამოუყენებლობის იურიდიულად სავალდებულო გარანტიების აღების პროცესი ქართულ-აფხაზური და ქართულ-ოსური სახელმწიფო საზღვრების დელიმიტაციით უნდა დაიწყოს და გაგრძელდეს შემდგომი დემარკაციით.