ამ წუთებში, ზუგდიდის მერიის წინ ახალგაზრდები აქციას მართავენ.

მათ ხელში უჭირავთ ბანერები, წარწერით: „გაიფიცე“.

მათი თქმით, მერიის შენობის წინ იმიტომ შეიკრიბნენ, რომ საჯარო მოხელეებს მოუწოდონ, შეუერთდნენ მოქალაქეების პროტესტს:

„საჯარო მოხელეები უნდა იყვნენ ის ადამიანები, ვინც იცავს საქართველოს ინტერესებს, კონსტიტუციას, მათ არა მხოლოდ მორალური, არამედ მოქალაქეობრივი პასუხისმგებლობა აკისრიათ, რომ საკუთარი პოზიცია დააფიქსირონ და ჩვენთან ერთად დადგნენ“, - ამბობს, აქციის ერთ - ერთი მონაწილე, ანი ჭანია.

მოქალაქეების ნაწილი უკვე მე - 9 დღეა, ხალხმრავალ დემონსტრაციებს მართავს საქართველოს სხვადასხვა ქალაქში, მათ შორის ზუგდიდში. მათი თქმით, ქვეყანაში მიმდინარე პროცესები საქართველოს სახელმწიფოებრიობის შენარჩუნებასა და კონსტიტუციის 78-ე მუხლის დარღვევას ეხება, რომელიც ხელისუფლებას ევროპულ და ევროატლანტიკურ სტრუქტურებში საქართველოს სრული ინტეგრაციის უზრუნველსაყოფად ყველა ზომის მიღებას ავალდებულებს.

ზუგდიდელები და სამეგრელოს სხვა მუნიციპალიტეტების წარმომადგენლები ზუგდიდში, სამხარეო ადმიისტრაციის წინ, ისევ შეიკრიბნენ, რის შემდეგც ქალაქის ქუჩებში მსვლელობა გამართეს.