დღეს, ზუგდიდში, სახელმწიფო რწმუნებულის ადმინისტრაციის შენობის წინ, ისევ შეიკრიბნენ მოქალაქეები, რომლებიც, თითქმის 20 დღეა, აპროტესტებენ „ქართული ოცნების“ გადაწყვეტილებას, ევროკავშირთან მოლაპარაკებების შეჩერების შესახებ.
გუბერნიასთან იმყოფებიან სხვადასხვა სფეროს წარმომადგენლები, სტუდენტები, მოსწავლეები, სამოქალაქო სექტორის წევრები, პოლიტიკოსები, სხვადასხვა ასაკის ადამიანები.

74 წლის ავრორა მოსია, რომელსაც ქართული დროშა უჭირავს ხელში, ამბობს, რომ ორ კვირაზე მეტია აქციაზე მოდის. ის თვლის, რომ ევროინტეგრაციის გზიდან გადახვევა, საფრთხეს უქმნის ქვეყნის და ახალგაზრდობის მომავალს.  

„15 დღეა აქ რომ ვდგავარ, იმიტომ ვდგავარ, რომ ჩემს შვილებს, შვილიშვილებს კეთილი მომავალი ჰქონდეთ. მინდა, რომ ჩემი ქვეყანა იყოს გაბრწყინებული და ახალგაზრდებს ჰქონდეთ ყველაფერი საუკეთესო. ვუსურვებ სამშობლოს ევროპისკენ წინსვლას. ისინი, ვინც სახლში არიან, არ არიან, ბებო, მართალი, ძალა ერთობაშია, ერთად თუ ვიდგებით, გავიმარჯვებთ და წავალთ ევროპაში“, - ამბობს ხანდაზმული ქალი.

დღესაც, დემონსტრანტებს ხელში საქართველოსა და ევროკავშირის დროშები, ასევე პროტესტის გამომხატველი სხვადასხვა ბანერი უჭირავთ.

ამ წუთებში, სიტყვით გამომსვლელები მიმართავენ შეკრებილებს, ადგილზე დამონტაჟებულია მონიტორი , რომელზეც თბილისში მიმდინარე აქციის პირდაპირი ტრანსლაციის ნახვაა შესაძლებელი.


აქციის ერთ- ერთმა ორგანიზატორმა, არჩილ თოდუამ, მცირე ისტორიული ექსკურსი ჩაატარა და გაიხსენა საქართველოს დამოუკიდებლობის პირველი წლები, როდესაც საქართველოში ორჯერ ჩატარდა თვითმმართველობის არჩევნები. მაშინ, მისი თქმით, პირველად არჩეულმა თვითმმართველობამ, როდესაც დადგა პოლიტიკური კრიზისის წინაშე, უფლებამოსილება შეიწყვიტა და ხელახალი არჩევნები გამართა, მათ შორის, ზუგდიდშიც. 

„პირველ რესპუბლიკაში 100 წლის წინ ვირჩევდით მოსალმართლეებს, ვირჩევდით რეგიონულ ხელისუფლებას, ვირჩევდით პირდაპირი წესით თვითმმართველობის ორგანოს, ვირჩევდით რა თქმა უნდა, პარლამენტსაც, და იმდროინდელი არჩევნები იყო დემოკრატიული, მიუხედავად იმისა, რომ იმდროინდელ სოციალურ - დემოკრატიულ პარტიას ჰქონდა ხმათა უმრავლესობა პარლამენტში, მათ ერთპიროვნული მართვა ქვეყნის არ დაუწყიათ და პროპორციულად ძალაუფლება გადაუნაწილეს იმ პარტიებს, რომლებიც იმ დროს წარმოადგენდნენ ოპოზიციურ პოლიტიკურ ჯგუფებს, მათ შორის, ზუგდიდიც, მაშინაც ოპოზიციაში იყო და აქ სოციალ- დემოკრატებს, გაცილებით ნაკლები ხმა ჰქონდა ვიდრე ცენტრში, რისი ნიშანია ეს? ეს არის ნიშანი იმისა, რომ ჩვენი ქვეყანა არის ევროპული სახელმწიფო, ჩვენს ქვეყანას აქვს ყველანაირი ცოდნა ევროპული დასავლური სახელმწიფოსი და ერთადერთი, ვინც ამაში ხელს გვიშლიდა ისტორიულად, იყო რუსეთი, და ვინც ამას დაემატა, ესენი არიან ქართველები თუმცა რუსული საქმის მკეთებლები“, - აღნიშნა მან.

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, თბილისსა და საქართველოს სხვადასხვა ქალაქში, მათ შორის, ზუგდიდში, საპროტესტო აქციები იმართება.

ამავე თემაზე:

ზუგდიდში მე-18 დღეა ევროკავშირთან მოლაპარაკებების პროცესის შეჩერებას აპროტესტებენ (ფოტო)

აქცია და მსვლელობა ზუგდიდში - პროტესტის მე - 17 დღე (ფოტო)

"საქართველო არასოდეს არ იქნება რუსეთი", - პროტესტის მე -14 დღე ზუგდიდში (ფოტო)

ბოლო ათ დღეში, ძალოვნებმა 70-ზე მეტი ჟურნალისტი და ოპერატორი დააზიანეს - მედიაომბუდსმენი