დღეიდან, 8 იანვრის ჩათვლით, აფხაზეთის დე ფაქტო რესპუბლიკაში იმართება ფესტივალი „მანდარინი“. სპეციალურად, ამ ღონისძიებისთვის, სოხუმში, 31 დეკემბერს დადგეს მანდარინის „ნაძვის ხე“, რომლის სიმაღლე 5 მეტრს შეადგენს.

აფხაზური მედიის თანახმად, მის მოსაწყობად 1.5 ციტრუსი დაიხარჯა. აქვე აღნიშნულია, რომ მანდარინის „მაძვის ხემ“ რეკორდი უნდა მოხსნას, რადგან შარშან მსგავსი კონსტრუქციის სიმაღლე, მხოლოდ 3 მეტრს აღწევდა. 

“აბხაზია ინფორმის“ წერდა, რომ ფესტივალის ფარგლებში, რომელიც 2025 წელს პირველად ჩატარდება, სხვადასხვა გასართობი ღონისძიება იგეგმება ტურისტებისთვის, მათ შორის: საჰაერო ბურთით ფრენა, პლანტაციების დათვალიერება და მოსავლის აღებაში მონაწილეობა, ფოტოსესია, მასტერ - კლასები და სხვ.

დეკემბრის დასაწყისში ცნობილი გახდა, რომ რუსეთმა აკრძალა მანდარინის „იმპორტი“ აფხაზეთიდან. ამის შესახებ ოკუპირებული აფხაზეთის ე.წ. პრემიერ-მინისტრის მოვალეობის შემსრულებელმა ვალერი ბგანბამ განუცხადა „ინტერფაქსს“

„რუსეთის მხარემ აკრძალა აფხაზეთიდან მანდარინის შეტანა, სანიტარულ სამსახურებზე დაყრდნობით, როგორც წესი, ეს მავნებელი აფხაზეთში რიგგარეშე არჩევნების წინა დღეს გვხვდება რუსეთის მხარეს. სამწუხაროდ, ეს ღონისძიება შეეხება მოსახლეობის უღარიბეს ფენებს, რომლებიც მათი მოსავლის წყალობით ცხოვრობენ“, - დასძინა მან. 

ბგანბას სიტყვებით, „აფხაზეთის სანიტარული სამსახურები უარყოფენ ციტრუსში მავნებელი მწერის არსებობას“, "როსსელხოზნადზორში" კი განაცხადეს, რომ არ დაუწესებიათ აკრძალვა ციტრუსზე. მათივე მონაცემებით, სეზონის დასაწყისიდან დეკემბრის შუა რიცხვებამდე "აფხაზეთმა რუსეთში 20,1 ათასი ტონა მანდარინი გაიტანა".




რუსული პროპაგანდისტული მედიის ცნობით, რუსეთში მანდარინის "ექსპორტი" ზამთარში აფხაზი ფერმერების მთავარი შემოსავლის წყაროა და რომ "ამ სეზონზე რუსეთში აფხაზეთიდან 36 ათასი ტონა ციტრუსის შეტანა იგეგმებოდა".

მანამდე, ტელეგრამის არხი RESPUBLICA წერდა, რომ მოსკოვს  სოხუმის წინააღმდეგ სანქციების დაწესების შესახებ თხოვნით ყოფილმა "პრეზიდენტმა" ასლან ბჟანიამ მიმართა.

6 დეკემბერს ცნობილი გახდა, რომ რუსეთმა ოკუპირებულ აფხაზეთს სრულად შეუჩერა დაფინანსება, აფხაზი ლიდერის ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ.