ზუგდიდში მიმდინარე აქციაზე პიროტექნიკის გასროლის გამო, აქტივისტები მარიამ სიჭინავა და კერენ ესებუა დააკავეს. შემთხვევა სახელმწიფო რწმუნებულის ადმინისტრაციის შენობის მიმდებარედ ცოტა ხნის წინ მოხდა, როდესაც მოქალაქეები აქციაზე დასასწრებად იკრიბებოდნენ.

ადგილზე მობილიზებულმა სამართალდამცავებმა დაკავებული აქტივისტები ტერიტორიიდან პოლიციის მანქანებით გაიყვანეს.

შეგახსენებთ, ზუგდიდის რაიონულ სასამართლოში პარტია "დროას" რეგიონული წარმომადგენლისა და აქტივისტის მარიამ სიჭინავას სასამართლო პროცესი გუშინ, 15 იანვარს გაიმართა. სასამართლომ აქტივისტი პიროტექნიკის გამოყენების ორ, ხოლო ბალაკლავას ტარების ექვს ეპიზოდშივე სამართალდამრღვევად ცნო და ადმინისტრაციული სახდელის სახით 5000 ლარი დააკისრა. ის 13 იანვარს, დააკავეს და სამტრედიის დროებითი მოთავსების იზოლატორში გადაიყვანეს.

გარდა ამისა, 14 იანვარს, სასამართლოში აქციის მონაწილეების, ცაბუნია ვართაგავასა და კერენ ესებუას სასამართლო პროცესი გაიმართა. ე.წ ბალაკლავას ტარებისთვის, ისინი დამნაშავედ ცნეს და ადმინისტრაციულ პასუხისმგებლობად 2000-2000 ლარის ოდენობის ჯარიმა დააკისრეს.

დღეს პროტესტის 50-ე დღეა. მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, პერმანენტული საპროტესტო აქციები იმართება.


ამავე თემაზე: 

სასამართლომ მარიამ სიჭინავა 5000 ლარის ოდენობის ჯარიმით გაათავისუფლა

ზუგდიდის რაიონულმა სასამართლომ აქციის მონაწილეები ბალაკლავას ტარებისთვის დააჯარიმა

მარიამ სიჭინავა სამტრედიის დროებითი მოთავსების იზოლატორშია გადაყვანილი - ადვოკატი

ზუგდიდში, აქციის მსვლელობისას, „დროას“ აქტივისტი მარიამ სიჭინავა დააკავეს