დღეს, 10 თებერვალს ზუგდიდის მუნიციპალიტეტის საკრებულოში რიგგარეშე სხდომა გაიმართა. დღის წესრიგით განსაზღვრული საკითხი მუნიციპალიტეტის 2025 წლის ბიუჯეტში შესატანი ცვლილება იყო, რომელიც საკრებულოს დეპუტატების უმრავლესობამ დაამტკიცა.

კერძოდ, საკითხი ეხებოდა 2024 წლის ადგილობრივ ბიუჯეტში დარჩენილი ნაშთის, 5 368 300 ლარის, 2025 წლის ბიუჯეტში ასახვას, რასაც „საქართველოსთვის“, „ერთიანი ნაციონალური მოძრაობის“ და „ქართული ოცნების“ წევრებმა მხარი დაუჭირეს, ხოლო ფრაქცია „ახალის“ წარმომადგენლებმა კენჭისყრაში მონაწილეობა არ მიიღეს.

ცვლილების მხარდამჭერებმა განმარტეს, რომ მიმდინარე წლის ბიუჯეტში არსებული ვალდებულებები, არ უნდა შეფერხდეს, აღნიშნული გადაწყვეტილება კი ტექნიკურ და სამართლებრივად აუცილებელ პირობას წარმოადგენდა. „ახალის“ წევრების თქმით, მერიის წარმომადგენლების განმარტება, თუ რატომ დარჩა აუთვისებელი თანხა ბიუჯეტში, სხდომაზე არ იყო დასაბუთებულად წარმოდგენილი.

ცნობისთვის, აღნიშნული საკითხი საკრებულოს დეპუტატებმა 5 თებერვალსაც განიხილეს. სხდომა ხმაურის ფონზე მიმდინარეობდა.

საკრებულოს სხდომას წინ უსწრებდა, ცალკეულ მედიასაშუალებებში ზუგდიდის მერის, მამუკა წოწერიას მიერ გაკეთებული განცხადება, რომ „ოპოზიციური საკრებულო უკვე მერამდენე დღეა, ვიწრო პარტიული ინტერესების გამო, მნიშვნელოვან ფინანსურ ტრანზაქციებს აფერხებს“. პასუხად, წარმომადგენლობითი ორგანოს ოპოზიციონერმა დეპუტატებმა სხდომაზე თქვეს, რომ მერიისგან შესაბამისი ინფორმაცია გამოითხოვეს, თუ რა მიზეზებით ვერ მოხერხდა ბიუჯეტის ათვისება, რის შესახებაც, მათი განმარტებით, დოკუმენტაცია არ მიუღიათ.

ინფორმაციისთვის, 26 დეკემბერს, ზუგდიდში საკრებულოს რიგგარეშე სხდომა გაიმართა, რომელზეც მუნიციპალიტეტის 2025 წლის ბიუჯეტი დაამტკიცეს. მისი მოცულობა 70 მილიონ 500 ათასი ლარით განისაზღვრა და მას მხარი "ქართული ოცნების", "ახალის" და "საქართველოსთვის" წევრებმა დაუჭირეს. სხდომას არ ესწრებოდნენ "ნაციონალური მოძრაობის" დეპუტატები, რომლებმაც წარმომადგენლობითი ორგანოს მიერ ბიუჯეტის დამტკიცების საკითხზე ბრიფინგი გამართეს და აღნიშნეს, რომ მიღებული გადაწყვეტილება არ ასახავს ზუგდიდელების ინტერესს.


ამავე თემაზე:

ზუგდიდის საკრებულოში ხმაური მოჰყვა მუნიციპალიტეტის 2024 წლის ბიუჯეტში დარჩენილი ნაშთის მიმდინარე წლის ბიუჯეტში ასახვის საკითხის განხილვას (ფოტო)

ზუგდიდის საკრებულოში ადგილობრივი ბიუჯეტი დაამტკიცეს - ოპოზიციონერი დეპუტატების გამოხმაურებები

ენმ - ში აცხადებენ, რომ პარტიას არ წარმოადგენენ მათი წევრები, რომლებმაც ჩხოროწყუს საკრებულოში ბიუჯეტს დაუჭირეს მხარი

ზუგდიდის საკრებულოში ბიუჯეტის მხარდაჭერის გამო "ახალის" წევრები პარტიას ტოვებენ